«Պատվաստում ստանալու, պատվաստանյութ ընտրելու թույլտվությունն ազատականացված է, եթե անձը հիմա էլ ուզում է այլ պատվաստանյութ ստանալ, ապա նրան թույլատրվում է»,-քաղաքացիներից մեկի հարցին՝ անձը կարո՞ղ է մեկ անգամ երկու դեղաչափով «Սպուտնիկ» պատվաստանյութ ստանալուց հետո վեց ամիս անց պատվաստվել «Մոդեռնա» պատվաստանյութով, այսպես պատասխանեց ՀՀ ԱՆ Հիվանդությունների վերահսկման և կանխարգելման կենտրոնի մասնագետ Բրիջիդա Սիմոնյանը:
Նշենք, որ ՀՀ Առողջապահության նախարարության նախաձեռնությամբ կազմակերպվեց կորոնավիրուսային հիվանդության և սեզոնային գրիպի դեմ պատվաստումների վերաբերյալ առցանց խորհրդակցություն, որի ընթացքում քաղաքացիները կարող էին մասնագետներից իրենց հուզող հարցերի պատասխանները ստանալ: Սակայն հարցերը շատ չէին:
Հարցին՝ առողջության հետ կապված ռիսկեր կա՞ն, երկու դեղաչափով մի տեսակի պատվաստանյութ ստանալուց ամիսներ անց մեկ այլ պատվաստանյութ կիրառելու դեպքում, Բրիջիդա Սիմոնյանը պատասխանեց. «Այդ փորձն ամբողջ աշխարհում կիրառվում է: Միլիոնավոր մարդիկ այսպիսի ձևաչափով են արել պատվաստումը: Եթե անգամ մարդու մոտ առաջանան առողջական խնդիրներ, ապա հստակ դա չպետք է կապել պատվաստանյութի հետ: Կորոնավիրուսի դեմ պատվաստումն ի վերջո միտված է նրան, որ օրգանիզմում առաջանան հակամարմիններ: Եթե նախորդ պատվաստանյութից ինքն ունի հակամարմին այն չափով, որով իմունիտետը կարող է ընկալել, երկրորդ երրորդի դեպքում կամ հակամարմինների թիվը կբարձրանա կամ կմնա նույնը: Դա որևէ առողջական խնդիր առաջացնել չի կարող»:
Տաթև ՀԱՐՈՒԹՅՈՒՆՅԱՆ
