Դեկտեմբերի 5-ին Վայոց ձորի Եղեգնաձոր խոշորացված համայնքում համամասնական ընտրակարգով տեղի է ունենալու ավագանու անդամների ընտրություն։ Եղեգնաձոր համայնքի մեջ ընդգրկված են Գետափ, Գլաձոր, Եղեգնաձոր, Մալիշկա, Վերնաշեն բնակավայրերը։ Համայնքն ունի 14508 ընտրող, իսկ ավագանու կազմը բաղկացած է լինելու 21 անդամից։ Եղեգնաձորում ընտրապայքարին մասնակցելու են 4 կուսակցություններ եւ 1 դաշինք։
«Ապրելու երկիր» կուսակցության ցուցակի 17 թեկնածուից մեկն ինքնաբացարկի դիմում է ներկայացրել։ Ցուցակը գլխավորում է «ՄՏՍ Հայաստան»-ի հիմնական հաճախորդների գծով ավագ մասնագետ, 41-ամյա Վահե Վարդանյանը։ Բոլոր թեկնածուները «Ապրելու երկիր» կուսակցության անդամներ են։
Մեկ այլ բջջային օպերատորի՝ «Տելեկոմ Արմենիա»-ի ավագ ճարտարագետ, 31-ամյա Ռուբիկ Սարգսյանը գլխավորում է «Հայ կառուցողական կուսակցության» 15 հոգանոց ցուցակը։ 3 թեկնածու ինքնաբացարկի դիմում է ներկայացրել։
Եղեգնաձորի ավագանու ընտրություններում առաջադրված «Հանրապետություն» կուսակցության 11 թեկնածուներից միայն մեկն է անկուսակցական՝ Գեւորգ Մանուկյանը։ Ցուցակը գլխավորում է Գետափի գինու գործարանի արտադրամասի պետ 34-ամյա Անուշավան Մովսիսյանը։
Կարդացեք նաև
«Քաղաքացիական պայմանագիր» կուսակցության ընտրացուցակը ամենամեծն է՝ 30 թեկնածու, որից մեկը ինքնաբացարկի դիմում է ներկայացրել։ Ցուցակը գլխավորում է 35-ամյա Եղեգնաձորի քաղաքապետի ժամանակավոր պաշտոնակատար (ԿԸՀ–ի կայքում թեկնածուի աշխատանքի վայրը այսպես է ներկայացված–Ա․Դ․) Մուշեղ Ներսիսյանը։
«Բարգավաճ Հայաստան» եւ «Դեմոկրատական այլընտրանք» կուսակցություններից կազմված «Դավիթ Հարությունյան» դաշինքի 29 հոգանոց ցուցակը գլխավորում է 55-ամյա Դավիթ Հարությունյանը։ Վերջինս ոչ մի տեղ չի աշխատում։ Հետաքրքիր է, որ դաշինքի ցուցակում Եղեգնաձորի համայնքի ղեկավարի երկու տեղակալներն են՝ 2-րդ հորիզոնականում Վարդան Ավագյանն է, իսկ 23-ում՝ Կարեն Բաբայանը։ Երկուսն էլ անկուսակցականներ են։ Մալիշկայի անկուսակցական համայնքի ղեկավար Գարիկ Նազարյանը դաշինքի ցուցակի 26-րդ համարն է։
Դեկտեմբերի 5-ին ավագանու ընտրություններ են նաեւ Վայոց ձորի մարզի Ջերմուկ եւ Վայք համայնքներում։ Այս համայնքներում ավագանին բաղկացած է լինելու 15 անդամներից։
Արմեն ԴԱՎԹՅԱՆ
