«Կորոնավիրուսի համավարակի հետ կապված ունենք իրադրության որոշակի մեղմացում, սակայն սա որեւէ բան չի նշանակում այն իմաստով, որ գիտեք, որ նոր շտամ է հայտնաբերվել՝ օմիկրոն: Դրանով վարակված քաղաքացի ՀՀ-ում չի հայտնաբերվել, բայց դեռ հստակ չէ, թե այս նոր շտամն ինչ ազդեցություն կարող է ունենալ, մարդիկ ինչ ծանրությամբ կտանեն հիվանդությունը»,-կառավարության այսօրվա նիստում ասաց վարչապետ Նիկոլ Փաշինյանը: Ըստ նրա, դեռեւս պարզ էլ չի, թե պատվաստանյութերի ազդեցությունն ինչպիսին կլինի. «Հետեւաբար, առաջիկայում մենք պետք է չթուլացնենք մեր զգոնությունը որեւէ կերպ՝ մինչեւ նոր շտամի հետ կապված իրադրությունը լավանա»:
Նիկոլ Փաշինյան
Վարչապետն ասաց, որ շոշափելի արդյունքներ ունենք պատվաստման հետ կապված. «Երկու անգամ պատվաստված քաղաքացիների թիվը հատել է 480 հազարի շեմը, մոտենում ենք 500 հազարին: Բացի շաբաթ-կիրակի օրերից, մեզ հաջողվում է 20 հազարից ավելի պատվաստումներ իրականացնել, եւ հիվանդանոցային կարողությունների լարվածությունն էլ էականորեն նվազել է»:
Անահիտ Ավանեսյան
Առողջապահության նախարար Անահիտ Ավանեսյանն ասաց, որ պատվաստումները շարունակում են մնալ կորոնավիրուսի դեմ պայքարելու, դրանից պաշտպանվելու ամենաարդյունավետ եւ միակ միջոցը: Ըստ նախարարի, պատվաստումների առաջին դեղաչափը ստացել է 18 տարին լրացած ՀՀ չափահաս բնակչության 40 տոկոսը, եւ երկրորդ դեղաչափը ստացել է, այսինքն` ամբողջական պատվաստում ունի արդեն չափահաս բնակչության 23,9 տոկոսը:
Կարդացեք նաև
Լուսինե ԲՈՒԴԱՂՅԱՆ
