Սիսակ Գաբրիելյանի պատասխանը՝ ընդդիմության քննադատություններին
ՔՊ պատգամավորը հակադարձում է՝ եթե բուհը ինքնավար է, հարգելի՛ հասարակություն, բա իրենք ինչո՞վ են պատասխանատու:
Եթե նախկինում Նիկոլ Փաշինյանը քննադատում էր ՀՀԿ-ին, որ հատուկ աղքատ են պահում ժողովրդին, ինչ է թե ընտրություններին 5000 դրամ տան ու ձայն առնեն, ապա այս իշխանություններին քննադատում են, որ կրթության ոլորտում այնպիսի քաղաքականություն են վարում, որ դեգրադացնեն մարդկանց, որ ինչ ասեն՝ ծափ տան իրենց:
«Առավոտը» այս թեմայով զրուցել է ՔՊ պատգամավոր, ԱԺ գիտության, կրթության, մշակույթի, սփյուռքի, երիտասարդության եւ սպորտի հարցերի հանձնաժողովի նախագահ Սիսակ Գաբրիելյանի հետ: Նա սկսեց հակափաստարկներ բերել. «Միանշանակ, համաձայն չեմ: Ես կտրականապես համաձայն չեմ այդ որակումների հետ ոչ միայն մեր մասով, այլ նաեւ ընդդիմության մասով: Ես չեմ կարծում որ ոչ մեր ընտրողները, ոչ նրանք, ովքեր խորհրդարանական ընդդիմությանը ձայն են տվել, իրենք պետք է չափվեն գիտելիքի բազայով, կարողություններով: Այդ պնդումները ինձ համար անընդունելի են, դա նշանակում է՝ դասակարգերի ենք բաժանում ու վիրավորում ենք այն 700 հազար ընտրողներին, ովքեր ընտրել են ՔՊ-ին, կամ այն 270 հազար ընտրողներին, ովքեր ընտրել են «Հայաստան» դաշինքին, «Պատիվ ունեմ-ին»: Մեր հասարակության մեջ կան եւ բարձրագույնն ավարտածներ, եւ միջին մասնագիտական կրթությամբ մարդիկ, ընդհանրապես բուհ չավարտած մարդիկ, այդպիսի մարդիկ կան ե՛ւ մեր ընտրողների մեջ, ե՛ւ ընդդիմության: Ինչ վերաբերում է, որ հատուկ քաղաքականություն ենք վարում, ես կարող եմ ասել, թե ինչ է անում կառավարությունը, եթե մեր ընդդիմության ներկայացուցիչները շարունակեն պնդել, որ դա դեգրադացման է տանում, ապա զերծ կմնամ մեկնաբանություններից: Մենք կամավոր ատեստավորում արեցինք այս տարի, հաջորդ տարի պարտադիր փուլն է ներառելու եւ 5-12-րդ դասարանների բոլոր ուսուցիչները ատեստավորում հանձնելու դեպքում իրենց աշխատավարձը 50%-ով կբարձրանա: Մենք հիմա ուսուցչի աշխատավարձ ենք բարձրացնում, 30-50% է միայն ատեստավորմամբ: Հիմա «Հանրակրթության մասին» օրենքն է գալիս եւ հաջորդ տարի նախատեսվում են տարակարգեր, ուզում ենք, որ ուսուցչի կարիերայում առաջընթացը լինի գրավիչ: Ուսուցիչները կհավաքեն կրեդիտներ, կբարձրացնեն աշխատավարձերը»:
Կարդացեք նաև
Երբ հիշեցրինք կամավոր ատեստավորման քննությունների հետ կապված քննադատությունները, Սիսակ Գաբրիելյանն ասաց, որ սա առաջին փուլն է ու նախարարությունն էլ ընդունում է, որ հարցաթերթիկների, ատեստավորման բովանդակության մասով խնդիրներ եղել են. «Մշակվում են նոր չափորոշիչներ, որոնք էլի կարող է լավագույնը չլինեն, բայց նախկին թերությունները կշտկեն: Միայն ԿԳՄՍ-ի բյուջեն այս տարի ավելացել է 478 մլն դրամ, այսինքն, մոտ 100 մլն-ով ավելացել է բյուջեն: Գիտությանը հատկացվող միջոցներն այնքան են, որ բազմապատկես նախորդ տարիներինը՝ այդքան չի կարող լինել, մի քանի տասնյակ միլիարդ դրամ մենակ հատկացվել է գիտությանը: Ես ընդդիմախոսներին փորձում եմ հակադարձել ոչ թե գեղեցիկ, սուր քննադատելով, այլ՝ փաստերով: Սա հասարակությանը դեգրադացնե՞լ է, երբ ես գիտությանը ֆինանսավորում եմ տալիս 10 անգամ ավելի, երբ որ ես ուսուցչին ասում եմ, որ 1 տարվա ընթացքում ատեստավորմամբ ու տարակարգերով կարող ես քո աշխատավարձը 100%ով բարձրացնել, այսինքն, եթե դու հիմա ստանում ես 80-120 հազար դրամ, աշխատավարձդ հիմա դարձնում ենք 160-240 հազար դրամ»:
Մեր դիտարկմանը, որ մանր քայլեր արվում են, բայց գլոբալ առումով կրթության ոլորտում լուրջ փոփոխություն չեղավ, կրթության ոլորտը մնաց քաղաքականացված, Փաշինյանը մինչեւ հեղափոխությունն ասում էր՝ ԵՊՀ խորհրդի նախագահը ՀՀԿ նախագահ Սերժ Սարգսյանն է, բուհերի կառավարման խորհուրդները գտնվում են ՀՀԿ-ի վերահսկողության ներքո, պետք է ապաքաղաքականացվեն, դարձաք իշխանություն, ԵՊՀ հոգաբարձուների խորհդրի նախագահ ընտրվեց ՔՊ վարչության նախագահ Սուրեն Պապիկյանը՝ Սիսակ Գաբրիելյանը պատասխանեց. «Մի կողմից մեր ընդդիմախոսներն ու հասարակությունն ասում են՝ դուք դպրոցների վիճակը տեսե՞լ եք, կրթության որակը տեսե՞լ եք, բուհերի վիճակը տեսե՞լ եք, բայց հենց կառավարությունը թեկուզ 0,05% ազդեցության լծակ է ունենում այդ նույն բուհում կամ դպրոցներում, այդ նույն շրջանակն ասում է՝ դուք խախտում եք բուհի ինքնավարությունը: Հիմա ես ուզում եմ հասկանալ, եթե բուհը ինքնավար է, հարգելի՛ հասարակություն, բա ես ինչո՞վ եմ պատասխանատու: Պատասխանատու լինելու համար ես պետք է ինչ-որ լծակներ ունենամ: Եթե ես լիազորություն չունեմ որեւէ բուհում որեւէ դասախոսի փոխարինելու կամ նոր դասախոս ներգրավելու, ես անգամ լիազորություն չունեմ սահմանելու, թե ուսման վարձն ինչքան պետք է լինի, բա այդ դեպքում ես ոչ մի լծակ չունեմ, ստացվում է, ամբողջ կրթական որակի համար ե՞ս եմ պատասխանատու»:
Սիսակ Գաբրիելյանն ասաց, որ 1400 դպրոցներում բնագիտական առարկաների լաբորատորիաներ են ստեղծելու, փոխում են դպրոցների հին, քրքրված քարտեզները. «Հիմա այս քայլերը արվում են, ընդդիմախոսները շարունակում են պնդել, թե հասարակությանը պահում ենք դեգրադացված վիճակո՞ւմ»: Մեր դիտարկմանը, որ ձեր ասածները հիշեցնում են բանակի ելակի պատմությունը, դուք փոխում եք գույքը, միջավայրը, դա կարող է երեխաների տրամադրության վրա ազդել, մոտիվացնել, բայց դա կրթության որակ չի՝ Սիսակ Գաբրիելյանը պատասխանեց, որ խնդիրները բաժանել են խմբերի, հերթով անում են. «Սկսել ենք գույքի՞ց, այդպես չէ, բա աշխատավարձի բարձրացումը գո՞ւյք է: Մեր ընդդիմախոսները, որ ասում են՝ կրթության որակը վատն է, թող պատասխանեն՝ ի՞նչ նկատի ունեն, թվարկեք 5 ուղղություն: Էլի ասելու են՝ այս բուհի պատուհանները տեսե՞լ եք, ուսուցիչների աշխատավարձը, գույքային պայմանները… Կան նաեւ ոչ նյութական փոփոխություններ, կրթության չափորոշիչները, մենք անգամ դասագրքերն ենք փոխում»:
Հռիփոիմե ՋԵԲԵՋՅԱՆ
«Առավոտ» օրաթերթ
01.12.2021
