Դեկտեմբերի 5-ին ՀՀ Կոտայքի մարզի Հրազդան խոշորացված համայնքում համամասնական ընտրակարգով կայանալիք ավագանու ընտրություններին մասնակցության հայտ են ներկայացրել «Ապրելու երկիր», «Լուսավոր Հայաստան», «Հայ հեղափոխական դաշնակցություն», «Քաղաքացիական պայմանագիր» կուսակցությունները:
Aravot.am-ը, ուսումնասիրելով քաղաքական ուժերի ընտրական ցուցակները, պարզեց, որ «Ապրելու երկիր» կուսակցության քաղաքապետի թեկնածու Լևոն Ստեփանյանն ինքնաբացարկ է հայտնել: 11 հոգանոց ցուցակում ընդգրկված են «Սինոփսիս»-ի ճարտարագետներ, Քաղսի համայնքի ավագանու անդամ, Սևանի ԲԿ վերակենդանացման բաժնի բուժքույր և այլ մասնագետներ: Ցուցակի երկրորդ հորիզոնականը զբաղեցնում է ՀՀ ԿԳՄՍՆ պատմության և մշակույթի հուշարձանների պահպանության վարչության ավագ մասնագետ Մոնթե Մաթևոսյանը:
«Լուսավոր Հայաստան» կուսակցության 11 հոգանոց ցուցակը գլխավորում է «ԱՆՆԱՐ» ՍՊԸ տնօրեն Արշավիր Խաչատրյանը, 2-րդ հորիզոնականում է «ՀԷՑ»-ի «Գեղամա» մասնաճյուղի «Հրազդան» էլցանցի կարգավար Դավիթ Խաչատրյանը: Ցուցակում երկուսն են անկուսակցական, մյուս թեկնածուները ԼՀԿ անդամներ են: ԼՀԿ ցուցակում ներառված են մասնագիտությամբ տնտեսագետներ, դիմահարդար: Ցուցակի 5-րդ համարն է «Քաղաքացիական ակադեմիա» ՀԿ նախագահ, գրող, հրապարակախոս Ջուլիետտա Բուբուշյանը:
«Հայ հեղափոխական դաշնակցության» քաղաքապետի թեկնածուն Հրազդանի ընտրություններում «Գազպրոմ-Արմենիա»-ի Հրազդան-5 մասնաճյուղի իրավախորհրդատու Վարդան Գևորգյանն է, 2-րդ համարը ՀԷՑ-ի տեղամասի պետ Աշոտ Ասրյանը: Ցուցակում 10 թեկնածու ՀՅԴ անդամ է, 4-ը անկուսակցական: ՀՅԴ 14 հոգանոց ցուցակից 10-ը չեն աշխատում:
Կարդացեք նաև
«Քաղաքացիական պայմանագիր» կուսակցության Հրազդան համայնքի ղեկավարի թեկնածուն գործող քաղաքապետ, ԵԿՄ նախագահ Սասուն Միքայելյանի որդի Սևակ Միքայելյանն է, 2-րդ համարն է Հրազդան համայնքի ղեկավարի տեղակալ Վարուժան Սաֆարյանը: ՔՊ-ի 38 հոգանոց ցուցակում բոլոր թեկնածուները ՔՊ անդամներ են, նրանց շարքում է «ՍԻԼ Կոնցեռն»-ի պահեստապետը, «Առաքելություն Հայաստան» ԲՀԿ ցերեկային կենտրոնի ղեկավարը, Կոտայքի մարզպետարանի առողջապահության և սոցիալական ապահովության վարչության խորհրդականը, ֆինանսական և սոցիալ տնտեսական զարգացման վարչության պետը, Հրազդանի թիվ 5 դպրոցի փոխտնօրենը, համատիրության կառավարիչներ և այլք:
Տաթև ՀԱՐՈՒԹՅՈՒՆՅԱՆ
