Միայն անցած տարի «Տարվա 10 լավագույն մարզիկներ» մրցույթը չանցկացվեց COVID-ի եւ 44-օրյա պատերազմի պատճառով:
Այսօր հրավիրված մամուլի ասուլիսում ԿԳՄՍ փոխնախարար Կարեն Գիլոյանը ասաց, որ ամեն ինչ արվում է այդ ավանդույթը վերականգնելու համար: «Լավագույն 10-յակ հասկացությունն արժե ավելին: Դրա համար կառավարությունը հատկացրել է գումար, եւ լավագույն 10-յակում ընդգրկված մարզիկները, հավաքականների գլխավոր եւ անձնական մարզիչները, ինչպես նաեւ բժիշկները կամ մերսորդները դրամական պարգեւ կստանան: Սա աննախադեպ է: Միայն մեկ անգամ՝ 2019 թվականին, մարզիկներին գումար է տրվել, իսկ մինչեւ դա եւ անցած տարի նման բան չի եղել:
Մի փոքր փոփոխության է ենթարկվել կարգը: Նոր կարգի համաձայն, Հայաստանի լավագույն մարզիկ չի որոշվելու եւ լավագույն 10-յակում մարզիկները կշարվեն ըստ այբբենական կարգի:
Լավագույն 10-յակին որոշելու են այն մարզական լրագրողները, որոնք տարվա ընթացքում լուսաբանում են մարզական միջոցառումները: Ի դեպ, հավատարմագիրը տրվելու է ոչ թե լրագրողին, այլ լրատվամիջոցին: Ամեն մի լրատվամիջոց կունենա մեկ հավաստագիր: Դրա համար պետք է մեր նախարարության տեղեկատվական վարչությունում գրանցվել եւ ստանալ համապատասխան արտոնագիր:
Կարդացեք նաև
Քվեարկությանը կմասնակցեն նաեւ հավաքականների գլխավոր մարզիչները: Եվ այս երկու կառույցների ներկայացուցիչների քվեարկության արդյունքում էլ կորոշվի լավագույն 10-յակը»,-ասաց Կարեն Գիլոյանը եւ հավելեց, որ նախորդ տարիներին մարզիկներին ընտրելու համար մտցված SMS քվեարկություն չի լինելու: «Սակայն SMS քվեարկությունը մնացել է, բայց այդ քվեարկությամբ որոշվելու է ոչ թե լավագույն 10-յակը, այլ նոր անվանակարգի՝ «Հանդիսատեսի համակրանք» մրցանակի դափնեկիրը: Այս մրցանակին կարող է հավակնել երկիր մոլորակի ցանկացած երկրում ապրող, մարզվող ու այդ երկրի դրոշի ներքո հանդես եկող հայազգի մարզիկ: Մրցանակը նույնն է, սակայն պարգեւատրվելու է միայն մարզիկը»,-ասաց նա:
Aravot.am-ի հարցին, թե քվեարկությունը երբ եւ որտեղ է լինելու ու թեկնածուների ցուցակը երբ է հրապարակվելու, նախարարի տեղակալը պատասխանեց, որ քվեարկության ամենայն հավանական օրը, թերեւս, դեկտեմբերի 21-ն է եւ այն կկայանա Երեւանում: Իսկ վերջնական ցուցակը հրապարակելու համար, թերեւս պետք է սպասել աշխարհի առաջնությունում մեր ծանրորդների արդյունքներին: «Բայց մինչեւ դեկտեմբերի 21-ը մենք, այնուամենայնիվ, որոշակի վերապահումով ցանկը կհրապարակենք՝ պայմանով, որ ծանրորդների մրցելույթները էական փոփոխություն կմտցնեն այնտեղ»,-պատասխանեց նախարարի տեղակալը:
Աշոտ ՀԱԿՈԲՅԱՆ
