Երեւանի ավագանու այսօրվա հերթական նիստում «Իմ քայլը» խմբակցության անդամ Լեւոն Զաքարյանը մայրաքաղաքի տրանսպորտային ցանցի խնդրին անդրադարձավ։ Լեւոն Զաքարյանը հիշեցրեց՝ 211 նոր ավտոբուսներ են ձեռք բերվել, դրանք շուտով կսկսեն աշխատել։ Ավագանու անդամն իր փորձով ներկայացրեց, որ Երեւանում տրանսպորտը լավ չի աշխատում․«Ինքս էլ տրանսպորտից օգտվում եմ, լավ կլինի առավոտյան ժամերին ավելի հաճախ տրանսպորտը մոտենա կանգառներին, ոչ թե քառասուն րոպեն մեկ կամ կես ժամը մեկ։ Կիրակի օրը 33 համարին ուղիղ քառասուն րոպե եմ սպասել։ Երեկոյան ժամերին էլ նույնն է, դրան էլ գումարվում էն այն, որ ոչ բոլորն են սպասարկում գոնե մինչեւ ժամը 22:00-ն»։
Նիստը վարող փոխքաղաքապետ Հրաչյա Սարգսյանն արձագանքելով Լեւոն Զաքարյանի հարցին, ասաց՝ այո, տրանսպորտի ոլորտում կա խնդիր․ «Նախորդ իմ խոսակցության մեջ ասացի, որ եթե մենք սպասում ենք, որ 211 ավտոբուսները մուտք են գործելու երթուղային ցանց եւ խնդիրները լուծվելու են, դա այդպես չէ։ Խնդրում եմ՝ մեր քաղաքացիներն այդ ակնկալիքները չունենան, դա մեծ պատկերի մի փոքր մասն է, որ եղած իրավիճակը բարելավելու է։ Այդ խնդիրները լուծելու համար հարկավոր են վերահսկողության ժամանակակից մեթոդներ։ Աշխատում ենք այդ ուղղությամբ, եւ կարծում եմ, որ 2022 թվականին մենք կունենանք այդ միասնական կառավարման կենտրոնը, որի միջոցով հնարավոր կլինի մեր ենթակայության տակ գտնվող տրանսպորտային կազմակերպություններն ու մասնավոր կազմակերպությունների աշխատանքը վերահսկել եւ դրա հիման վրա գնահատական տալ, թե խնդիրներն ինչից են առաջանում»։
Փոխքաղաքապետի ներկայացմամբ՝ շատ տեղերում երթեւեկությունը կանոնակարգված չէ, կամ եթե կանոնակարգած է, խցանումներ են լինում, ինչի պատճառով ավտոբուսները ժամանակին չեն ժամանում նշված վայր, վարորդների պակաս կա, կամ տրանսպորտային միջոցները վթարված, մաշված են լինում։
Նելլի ԲԱԲԱՅԱՆ
