«Դատարանը մերժել է Աղվան Հովսեփյանի կալանավորման ժամկետը երկարացնելու որոշման դեմ ներկայացված վերաքննիչ բողոքը»,- Aravot.am-ի հետ զրույցում տեղեկացրեց ՀՀ նախկին գլխավոր դատախազ, ՔԿ նախկին նախագահ Աղվան Հովսեփյանի պաշտպան Սասուն Ռաֆայելյանը։
Մեր հարցին՝ սպասելի՞ էր դատարանի այս որոշումը, Սասուն Ռաֆայելյանն արձագանքեց՝ որոշմանն ամբողջությամբ կծանոթանան, այնուհետև մեկնաբանություններ կանեն:
Հիշեցնենք՝ նոյեմբերի 2-ին Երևանի ընդհանուր իրավասության դատարանը՝ դատավոր Դավիթ Արղամանյանի նախագահությամբ որոշեց Աղվան Հովսեփյանի կալանքը ևս երկու ամսով երկարաձգել, ինչից հետո նրա պաշտպանները դատարանի որոշման դեմ վերաքննիչ բողոք ներկայացրին:
Աղվան Հովսեփյանը սեպտեմբերի սկզբին կալանավորվել էր։ Ըստ ՀՀ հատուկ քննչական ծառայության՝ Աղվան Հովսեփյանը գլխավոր դատախազի եւ քննչական կոմիտեի նախագահի պաշտոնները զբաղեցնելու ընթացքում մասնակցել է մի շարք ՍՊԸ-ների կառավարմանը, նաեւ՝ ստացել 190.000.000 ՀՀ դրամ կաշառք, խարդախության եղանակով կատարել 800.000.000 ՀՀ դրամ գույքի հափշտակություն, օրինականացրել է (փողերի լվացում) հանցավոր ճանապարհով ստացված ընդհանուր 1.299.404.414 ՀՀ դրամ գույքը։
Կարդացեք նաև
Աղվան Հովսեփյանը մեղադրանքը չի ընդունում։
Աղվան Հովսեփյանի պաշտպաններից Էրիկ Ալեքսանյանը համոզմունք էր հայտնել՝ քննության ընթացքում բոլորը կհամոզվեն, որ մեղադրանքները շինծու են։
Տաթև ՀԱՐՈՒԹՅՈՒՆՅԱՆ
