«Երեկվա դատավարության գործընթացը աբսուրդի և գրոտեսկի գագաթնակետ էր, երբ մարդը կանգում, ասում է՝ սուտ ցուցմունք եմ տվել, և փաստենք, որ Առուշ Առուշանյանն այդ միակ ցուցմունքի հիման վրա է գտնվում անազատության մեջ, սակայն նա հրաժարվում է իր ցուցմունքից, բայց Առուշանյանին շարունակում են պահել կալանքի տակ»,-«Հայելի» ակումբում հրավիրված մամուլի ասուլիսի ընթացքում հայտարարեց Ադրբեջանի հարցերով փորձագետ Անժելա Էլիբեգովան՝ անդրադառնալով Գորիս համայնքի ղեկավար Առուշ Առուշանյանի գործով դատավարությանը:
Հիշեցնենք՝ Առուշ Առուշանյանն ու Քարահունջի վարչական ղեկավար Լուսինե Ավետյանը մեղադրվում են ՀՀ Սահմանադրությամբ եւ ՀՀ ընտրական օրենսգրքով երաշխավորված՝ ՀՀ քաղաքացու ընտրական իրավունքի իրականացման՝ ազատության եւ կամավորության սկզբունքի խախտելու մեջ։ Նոյեմբերի 29-ին Սյունիքի մարզի ընդհանուր իրավասության դատարանի Գորիսի նստավայրում Գորիսի համայնքի ղեկավար Առուշ Առուշանյանի եւ մյուսների գործով դատական նիստի ժամանակ ամբաստանյալ, Քարահունջ համայնքի ղեկավար Լուսինե Ավետյանը հրաժարվեց նախաքննական մարմնին տված ցուցմունքից՝ հայտարարելով, որ ինքը սուտ ցուցմունք է տվել Առուշ Առուշանյանի դեմ։
Ըստ Անժելա Էլիբեգովայի՝ այս իրավիճակը հուշում է այն մասին, որ Սյունիքը պաշտպանող թիմին հատուկ պահում են անազատության մեջ: Փորձագետը մանրամասնեց. «Գորիսն ամբողջ պատերազմի թիկունքն էր պահում, զուգահեռ առաջնագիծ էր: Այս մարդիկ էին այդ ամբողջ աշխատանքները կազմակերպում, նրանք ցույց տվեցին, որ Սյունիքը չեն հանձնի: Տեսնում ենք՝ ինչ է կատարվում այս տղաներին փակելուց հետո. ադրբեջանցիները մտնում են, մաքսակետ դնում, գրավում ՀՀ ինքնիշխան տարածքից տասնյակ կիլոմետրեր, մեզ համար ռազմավարական նշանակություն ունեցող կետեր: Ցանկացած քաղաքացու մոտ ուստի պարզ հարց է առաջանում՝ ինչո՞ւ են շարունակում մեկուսացնել մարդկանց, որոնք կարողացել են Ադրբեջանի դեմն առնել տեղում: Բոլորի համար ամեն ինչ ակնհայտ է դառնում: Երբ կալանքի տակ գտնվող Առուշ Առուշանյանը հաղթում է համայնքի ղեկավարի ընտրություններում, դա նշանակում է, որ տեղի բնակչությունն ուզում է նրան ընտրել համայնքապետ, քանի որ տեսնում է, որ այդ անձն իրենց պաշտպանում է թշնամուց: Հարց է առաջանում՝ եթե համայնքի ղեկավարն ազատության մեջ լիներ, արդյոք կկարողանա՞յին ադրբեջանցիները շրջափակել մեր գյուղերը»:
Տաթև ՀԱՐՈՒԹՅՈՒՆՅԱՆ
