«Այսօր ԱՄՆ սենատում պետք է քննարկվի ԱՄՆ անվտանգության ընդհանուր բանաձեւը, որում ԱՄՆ Հայ դատի հանձնախմբի ջանքերով կա երկու բարեփոխում․ ԱՄՆ-ի օժանդակությունն Ադրբեջանին պետք է կրճատվի։ Նկատի ունենալով Ադրբեջանի հարձակողական դիրքը, 2020թ․-ի պատերազմը, այդ պատերազմի՝ մինչեւ այսօր վերջացած չլինելը՝ ԱՄՆ կառավարությունը չպետք է օժանդակություն տրամադրի Ադրբեջանին»,-ՀՅԴ Հայ դատի հանձնախմբերի եւ գրասենյակների երեւանյան խորհրդաժողովի ժամանակ այսօր լրագրողների հետ ճեպազրույցում հայտարարեց Ամերիկայի Հայ դատի հանձնախմբի մամուլի քարտուղար Էլիզաբեթ Չուլջյանը։
Նա շեշտեց, որ ԱՄՆ կառավարության՝ 2016թ․-ին Ադրբեջանին ֆինանսական օգնություն տրամադրելու հետեւանքը տեսանելի դարձավ նախորդ տարվա պատերազմի ընթացքում․ «Ամերիկյան տեխնոլոգիաներ օգտագործվեցին՝ թուրքական «բայրաքթարներ», եւ դրա դեմ պատժամիջոցներ պետք է լինեն։ Օրենքներ կան, ըստ որոնց՝ ամերիկյան տեխնոլոգիաները չպետք է օգտագործվեն խաղաղ բնակչության դեմ»։
Տիկին Չուլջյանի փոխանցմամբ՝ աշխատում են նաեւ այն ուղղությամբ, որպեսզի ԱՄՆ-ն մեծացնի օժանդակությունն Արցախին․ «ԱՄՆ կառավարությունը ոչ միայն պետք է կրճատի օժանդակությունն Ադրբեջանին, այլեւ հստակ պատժամիջոցներ սահմանի Ադրբեջանի եւ Թուրքիայի հարձակողական քայլերի դեմ»։
Լուիզա ՍՈՒՔԻԱՍՅԱՆ
