Հայաստանում կորոնավիրուսի «օմիկրոն» շտամի դեպքեր դեռ չեն գրանցվել, բայց մեր երկիրն էլ դրա տարածումը կանխելու համար տվյալ երկրներից եկող քաղաքացիների նկատմամբ որոշ սահմանափակումներ կկիրառի: Այս մասին այսօր տեղի ունեցած ասուլիսում հայտնեց առողջապահության նախարար Անահիտ Ավանեսյանը:
Նախարարն ասաց, որ «օմիկրոն» շտամը տարածվում է արագորեն եւ դրա վերաբերյալ ուսումնասիրությունները շարունակվում են։ Նա նշեց, որ այս շտամը ոչ թե ՊՇՌ թեստավորման արդյունքում են հայտնաբերում, այլ հատուկ հետազոտությամբ, որը Հայաստանում կատարվում է:
Անահիտ Ավանեսյանը թվարկեց այն երկրների ցանկը, որտեղից եկող քաղաքացիները կընկնեն սահմանափակումների տակ. «Հարավաֆրիկյան Հանրապետության, Բոտսվանայի Հանրապետության, Լեսոտոյի Թագավորության, Նամիբիայի Հանրապետության, Զիմբաբվեի Հանրապետության, Մոզամբիկի Հանրապետության, Մադագասկարի եւ Տանզանիայի քաղաքացիների ժամանակավոր մուտքը ՀՀ սահմանափակել, սրանից բացի որոշակի սահմանափակումներ եւս կլինեն»:
Կարդացեք նաև
Նախարարն ասաց, որ որոշ նմուշներ արդեն ուղարկվել են լաբորատորիա: Այս պահի դրությամբ, «օմիկրոն» շտամի դեպքեր Հայաստանում դեռ չեն գրանցվել, իսկ երբ այդ վիրուսը հայտնաբերվի, հանրությանն այդ մասին կտեղեկացնեն: Նոր շտամն, ըստ տիկին Ավանեսյանի, 50 մուտացիա է կրում, տարածումը սկսել է Հարավաֆրիկյան Հանրապետությունից:
Լուսինե ԲՈՒԴԱՂՅԱՆ
