Շախմատի Հայաստանի կանանց ազգային հավաքականի անդամ Աննա Սարգսյանի համար մրցաշրջան 2021-ը հաջող է ընթանում: Օգտվելով առիթից, որ նա պայմանականորեն հանգիստ է եւ հանրապետությունում է, Aravot.am-ը զրուցել է նրա հետ:
-Այս տարի բավականին լուրջ արդյունքներ արձանագրեցիր, սակայն Եվրոպայի թիմային առաջնությունում քո խաղը մի տեսակ չստացվեց:
-Ճիշտ եք նկատել: Կարծում եմ, դա հոգնածության հետեւանք էր: Հոկտեմբերի 15-ից սկսած միմյանց հաջորդող մրցաշարերի եմ մասնակցել: Սկզբից՝ Երեւան Օփենին: Այնուհետեւ մեկնեցի Լատվիա՝ 11 տուրից բաղկացած կանանց շատ ծանր մրցաշարի, որտեղ հավաքված էին աշխարհի գրեթե բոլոր ուժեղագույն կին շախմատիստները: Ի դեպ, այնտեղ ֆիզիկապես տեղաշարժվելու հետ կապված խնդիրներ կային՝ կապված կորոնավիրուսի հետ: Պատկերացրեք, ժամը 20:00-ից հետո արգելված էր հյուրանոցից դուրս գալ, ինչը խիստ սահմանափակում էր ֆիզիկական ակտիվությունդ: 14 օր, ասես, կիսակալանավորվածի կարգավիճակում լինեիր: Այս ամենն, անշուշտ, բացասաբար ազդեց Եվրոպայի թիմային առաջնությունում իմ մրցելույթի վրա:
-Այս տարի մրցաշրջանը քո համար փակե՞լ ես, թե՞ դեռ էլի ես պատրաստվում հանդես գալ մրցաշարերում:
Կարդացեք նաև
-Պլանավորում եմ դեկտեմբերի 8-ից մասնակցել Լեհաստանում անցկացվելիք մրցամարտի, որում այդ երկրի հինգ ուժեղագույն կին շախմատիստները խաղալու են աշխարհի տարբեր երկրներից ընտրված հինգ շախմատիստուհիների հետ, որոնց մեջ ես էլ ընդգրկվել: Ի դեպ, ընտրությունը կատարել են իրենք եւ ինձ այդ մասին տեղեկացրել վերջին մրցաշարի ժամանակ:
-Ունե՞ս նպատակ, որին անպայման ուզում ես հասնել:
-Թերևս, միշտ ավելի լավ խաղալ, քան երեկ:
-Դու կանանց գրոսմայստեր ես եւ տղամարդկանց միջազգային վարպետ: Մտածո՞ւմ ես նաեւ տղամարդկանց գրոսմայստերի կոչման արժանանալու մասին:
-Իհարկե: Եվ փորձելու եմ արդեն 2022 թվականին եթե դրա համար պահանջվող երեք նորմաները չհասցնեմ լրացնել, գոնե երկուսը լրացնեմ:
Աշոտ ՀԱԿՈԲՅԱՆ
