«Հայրենիք» կուսակցության անդամ Բաբկեն Հարությունյանը «Հայելի» ակումբում անդրադարձավ իրենց կուսակցության ղեկավար, ԱԱԾ նախկին տնօրեն Արթուր Վանեցյանի արած՝ իրեն, Հայաստանում որոշ պաշտոնատար անձանց եւ հատկապես ընդդիմադիր գործիչներին գաղտնալսելու մասին հայտարարությանը: «Նաեւ պաշտոնյաներն են գաղտնալսվում: Սակայն առաջինը գաղտնալսվում են ընդդիմադիր գործիչները, եւ գաղտնալսումն իրականացվում է իսրայելական «Pegasus» ծրագրով: Ո՞րն է դրա վտանգը: Մենք գիտենք, որ հատուկ ծառայությունները տարբեր ժամանակներում գաղտնալսում են այն քաղաքացիներին, որոնք ինչ-ինչ հարցերով հայտնվում են այդ ծառայությունների հետաքրքրության տիրույթում: Պարոն Վանեցյանը երեկ ներկայացրեց, որ դա իսրայելական մի ծրագիր է, որը գործում է բուն Իսրայելում: Այսինքն, այն պետությունները, որոնք ուզում են օգտվել այդ ծրագրից, տրամադրում են որոշակի միջոցներ, այդ թվում՝ ֆինանսական, եւ պատվիրում են գաղտնալսում:
Եթե մինչեւ հիմա Հայաստանում հատուկ ծառայությունները գաղտնալսել կարող էին դատարանի որոշմամբ եւ ամբողջ ինֆորմացիան գտնվում էր հատուկ ծառայությունների բազայում, այս դեպքում գործում է այլ մեխանիզմ: Դու պատվերը տալիս ես, քո պատվերի համաձայն իրենք գաղտնալսում, վերծանում են ու այդ տեղեկատվությունը փոխանցում են քեզ: Ինչ է սա նշանակում: Այդ նույն կորպորացիան կարող է գաղտնալսել ողջ տեղեկատվությունը, տեղեկատվությունը քեզ տրամադրել մասամբ, ինչու չէ, նաեւ վաճառել մեկ այլ պետության, օրինակ, թշնամի Ադրբեջանին, Թուրքիային: Ու դու դրա մասին, բնականաբար, իմանալ չես կարող, քանի որ սերվերը չի գտնվում քո երկրում:
Այսինքն, ոչ թե դու այդ ծրագիրը ձեռք ես բերում ու այն դառնում է քո երկրի սեփականությունը եւ քո երկրի անվտանգության ծառայությունն է գաղտնալսում, այլ դու պատվիրում ես, ուրիշը գաղտնալսում է ու մինչեւ քեզ տալը, ինքն ավելի շուտ է իմանում, թե ինչ է կատարվում, ինչ տեղեկատվություն է շրջանառվում քո երկրի ներսում:
Սա տգիտության եւ այս իշխանությունների ոչ կոմպետենտության գագաթնակետն է: Եվ շատ էական հանգամանք է, որ այս պարագայում չկա դատարանի որոշում, սակայն գաղտնալսումը իրականացվում է: Սա նշանակում է, որ Հայաստանում ոտնահարվում են մարդու իրավունքները»,- ասաց Բաբկեն Հարությունյանը:
Կարդացեք նաև
Աշոտ ՀԱԿՈԲՅԱՆ
