Վերաքննիչ դատարանը քիչ առաջ հրապարակեց որոշումը՝ հակասահմանադրական ճանաչված 300․1 հոդվածի 1-ին մասով ՀՀ երկրորդ նախագահ Ռոբերտ Քոչարյանի եւ մյուսների նկատմամբ գործը կարճելու դեմ տուժող կողմի եւ դատախազության բողոքների գործով:
Վերաքննիչը որոշեց Երեւան քաղաքի առաջին ատյանի դատարանի ապրիլի 6-ի որոշումը թողնել անփոփոխ:
Սա նշանակում է, որ գլխավոր դատախազության բողոքը, որ բեկանեն առաջին ատյանի դատարանի որոշումը ու դիմեն ՍԴ՝ իրենց հնարավորություն տալով նոր հոդվածով մեղադրել Ռոբերտ Քոչարյանին, մերժվեց:
Քոչարյանի պաշտպան Հովհաննես Խուդոյանը լրագրողների հետ զրույցում հարցին՝ ինչպե՞ս եք գնահատում դատարանի որոշումը եւ բողոքարկելո՞ւ եք, թե՞ ոչ՝ պատասխանեց, որ դեռ վաղ է խոսել բողոքարկման մասին. «Պատճառաբանությունները չգիտենք, համենայնդեպս, այն ներկայացրել ենք՝ բավարարելու ակնկալիքով»:
Ինչ վերաբերում է դատախազության բողոքին, Խուդոյանն ասաց. «Եվս մեկ անգամ փաստվեց, որ նման պահանջը չի համապատասխանում ՀՀ օրենսդրությանը»: Առայժմ արդարացման վճիռը շարունակում է ուժի մեջ լինել, եթե իհարկե, սահմանված ժամկետում՝ 1 ամսվա ընթացքում Վճռաբեկ չդիմեն ու չբողոքարկեն:
Կարդացեք նաև
Հիշեցնենք, որ Երեւան քաղաքի ընդհանուր իրավասության դատարանը, Աննա Դանիբեկյանի նախագահությամբ, քրեական գործը կարճելու եւ Ռոբերտ Քոչարյանի, Սեյրան Օհանյանի, Յուրի Խաչատուրովի, Արմեն Գեւորգյանի նկատմամբ քրեական հետապնդումը դադարեցնելու որոշումը կայացրել էր ապրիլի 6-ին՝ հանցագործության դեպքի բացակայության հիմքով: Որոշման հիմքում այն է, որ Սահմանադրական դատարանը մարտի 29-ին հրապարակած որոշմամբ Քրեական օրենսգրքի 300.1 հոդվածը ճանաչել էր ՀՀ Սահմանադրության 78-րդ և 79-րդ հոդվածներին հակասող։
Հռիփսիմե ՋԵԲԵՋՅԱՆ
