«Իրավական ուղի» ՀԿ համահիմնադիր Ռուբեն Մելիքյանը «Հայելի» ակումբում իր լուրջ մտահոգությունները հայտնեց այսօր Սոչիում մեկնարկած Ռուսաստան-Ադրբեջան-Հայաստան ղեկավարների եռակողմ հանդիպման վերաբերյալ՝ ասելով, որ ինքը հայանպաստ ոչ մի արդյունքի չի սպասում:
«Ոչ մի լավ բան չեմ ակնկալում այսօրվա եռակողմ հանդիպումից: Ես կարծում եմ՝ չկա Հայաստանում որեւէ գիտակից մարդ, որը շունչը պահած չի սպասում, թե այս անգամ որքան է զիջվելու մեր ազգային, պետական, մեր սերունդների շահերից, ապագայից, մեր հետագա սերունդների համար նորմալ պետություն կառուցելու հույսից: Ոչ միայն Նիկոլը, այլեւ նիկոլիզմը, հատկապես դրանց վերնախավը, չեմ հաշվում սովորական խաբված կամ իրենց խաբվածի տեղ դրածներին, աշխատավարձ են ստանում Հայրենիք ծախելու, հայրենիքը այս թշվառ-անտեր վիճակին հասցնելու համար:
Այսօր մենք այն վիճակում ենք, որ բանական որեւէ մեկը չի կարող ասել, թե 2018-ից սկսած մի գրամ առաջ ենք գնացել: Մարդիկ թող իրենց հիշեն 2017 թվականին եւ հիմա: Եվ թող գիտակցեն նաեւ, որ այս ընթացքում այդ մարդիկ կոնկրետ աշխատավարձ են ստացել, էլ չեմ ասում միլիոնների հասնող պարգեւավճարներ, այլեւայլ արտոնություններ, փաստացիորեն մեզ այս վիճակին հասցնելու համար»:
Աշոտ ՀԱԿՈԲՅԱՆ
