Քիչ առաջ ոստիկանները սկսեցին բերման ենթարկել Երեւանի փողոցներում խաղաղ բողոքի ցույց անող Ազատագրական շարժման նախաձեռնող խմբի անդամներին, որոնց թվում էր «Զարթոնք» կուսակցության ղեկավար Արա Զոհրաբյանը:
Ցույցի մասնակիցները հերթով փակում էին փողոցները՝ նշելով, որ հենց այդպես փակված են Սյունիքի ճանապարհները, ինչի արդյունքում մեր հայրենակիցները չեն կարողանում ազատ տեղաշարժվել: Շարժման մասնակիցները, ցույցի միջոցով իրենց անհամաձայնությունն են հայտնում սահմանազատման եւ սահմանագծման վերաբերյալ ստորագրվելիք փաստաթղթին:
«Սա խաղաղ բողոքի ակցիա է։ Մենք մեր անհամաձայնությունն ենք հայտնում Նիկոլ Փաշինյանի հակահայկական ծրագրին: Ժողովուրդ, արթնացեք, արթուն կացեք, միացեք մեր շարժմանը»,-հայտարարում էին նրանք:
Կարդացեք նաև
Ցույցի մասնակիցներին բերման ենթարկեցին Սախարովի անվան հրապարակից:
ՀՀ Ոստիկանության լրատվական ծառայությունից, Aravot.am-ի հարցմանն ի պատասխան հայտնեցին, որ ոստիկանության բաժանմունք բերման ենթարկված քաղաքացիների թիվը վեցն է: Նրանք, ըստ ոստիկանության, բերման են ենթարկվել ՀՀ վարչական իրավախախտումների վերաբերյալ օրենսգրքի 182 հոդվածով նախատեսված արարքի համար:
Ինչպես տեղեկացանք ոստիկանությունից, բերման ենթարկված ցույցի մասնակիցներին բաց կթողնեն՝ երեք ժամվա ընթացքում՝ ըստ ընթացակարգի:
Լուսինե ԲՈՒԴԱՂՅԱՆ
