«Ազգային ժողովում Նիկոլ Փաշինյանը հայտարարեց, թե ինքն է հրաման տվել, որ Սյունիքում զորքերը հետ քաշվեն: Տո, գլուխդ պատով ես տվել, դու ով ես, որ այդպիսի հրաման տաս»,- լրագրողների հետ հանդիպման ընթացքում ասաց ԱԱԾ նախկին տնօրեն, «Հայրենիք» կուսակցության նախագահ, ԱԺ «Պատիվ ունեմ» խմբակցության ղեկավար Արթուր Վանեցյանը:
Նա հիշեց, որ առաջին անգամ ձերբակալությունից հետո, երբ դուրս էր եկել իրեն հարցրել են, թե եթե ինքը լիներ Նիկոլ Փաշինյանի հետ չէր ստորագրի՞ հայտարարությունը. «Ասացի՝ ո՛չ: Բա Ստեփանակերտն էր վտանգված: Ասացի՝ ոչինչ, թո՛ղ Ստեփանակերտն էլ տար, բայց Քելբաջարն ու Լաչինը պահեր: Ու մի աղմուկ սկսեց՝ Վանեցյանը ասել է՝ Ստեփանակերտը տար, Քելբաջարն ու Լաչինը պահեր: Էլի եմ ասում՝ պետք չէր ոչ մի բան ստորագրել, պետք էր գնահատել իրավիճակը: Պաշտոնական տվյալներով 25 000ից ավել զորք ունեինք Արցախի տարածքում, հետ քաշենք դիրքերը, դիրքավորվել Քելբաջարի և Լաչինի տարածքում, ապահովել ՀՀ անվտանգությունը, որն այսօր չունենք»:
Արթուր Վանեցյանի խոսքով՝ այդ քայլերից հետո էլ, իհարկե՛, պետք էր պաշտպանել Ստեփանակերտը, բայց որևէ թուղթ չստորագրել և պայքարել երկրի համար:
Ամի ՉԻՉԱԿՅԱՆ
