ՀՀ վարչապետ Նիկոլ Փաշինյանի նոյեմբերի 23-ի առցանց ասուլիսի ընթացքում լրագրողների հարցերի ճնշող մեծամասնությունը անպատասխան մնացին, իսկ ընդհանուր ասուլիսը մանիպուլացված էր այն աստիճան, որ նույնիսկ քաղաքական հանրության համար շատ բարդ է իրականում հասկանալ, թե իրականում ի՞նչ է տեղի ունեցել. այս կարծիքն այսօր «Հայելի» մամուլի ակումբում հնչեցրեց ՀՀԿ խորհրդի անդամ, ՀՀ պաշտպանության նախարարի նախկին տեղակալ Արտակ Զաքարյանը: «Ասուլիսի ընթացքում կապիտուլյանտը մի շարք մտացածին հայտարարություններ արեց, որոնք ուղղակի վտանգ են հանդիսանում ՀՀ ներկա եւ ապագա զարգացումների համար»,- ասաց բանախոսը՝ հավելելով՝ եթե այդ հայտարարություններն են ընկած ՀՀ արտաքին եւ անվտանգային քաղաքականության հիմքում, ուրեմն, ՀՀ-ն առավել քան լրջագույն վտանգի մեջ է:
Արտակ Զաքարյանի դիտարկմամբ, Նիկոլ Փաշինյանը բավականին ընկճված եւ խեղճացած էր. «Հանցագործի, հանցանք գործածի կամ այն գիտակցող մարդու տպավորություն էր թողնում՝ իհարկե, քաղաքական իմաստով: Եվ կարծես թե արդեն կապիտուլյացիոն իշխանությունը գիտակցում է այն ամբողջ ողբերգության ծանրագույն հետեւանքները եւ դրա անելանելիությունը, ինչի մեջ իրենք գտնվում են: Կապիտուլյանտը եւ նրան շրջապատող անձինք ուղղակի պատկերացում չունեն պրոբլեմների լուծման վերաբերյալ: Նույնիսկ ՀՀ-ի առջեւ կանգնած խնդիրը ձեւակերպված չէ, ըստ նրանց, դա էին վկայում ասուլիսում հնչած «պատասխանները»:
Նոյեմբերի 26-ին Սոչիում կկայանան Փաշինյան-Ալիեւ-Պուտին բանակցությունները, իսկ դեկտեմբերի 15-ին Բրյուսելում նախատեսված է Հայաստանի ու Ադրբեջանի ղեկավարների հանդիպումը, որտեղ կայանալիք քննարկումների մասին հնչած հարցերի պատասխանները Արտակ Զաքարյանը խուսափողական եւ պարզամիտ է որակում. «Մի կարճ պրոզաիկ պատասխան եղավ՝ դե գնալու ենք՝ ստորագրենք, ինչ-որ հանձնաժողով ստեղծենք, որ սկսենք սահմանազատման եւ սահմանագծման աշխատանքները: Էդպես չի լինում, սա աշխարհաքաղաքական պրոցես է: Եվ եթե դա է ՀՀ-ին վերապահված, ուրեմն Հայաստանը՝ ի դեմս կապիտուլյանտի, օգտագործվում է այլ պետությունների շահերի կողմից: Եթե Նիկոլն ասում է, որ մեզանից հասնում է գնալ եւ ընդամենը հանձնաժողով ստեղծել ու գալ, այս իրավիճակում, դա նշանակում է՝ ՀՀ պաշտոնական շրջանակները, պաշտոնական Երեւանը այլեւս գոյություն չունի: Նա չի ասում, թե ի վերջո՝ Ադրբեջանի հետ օրակարգային ինչ հարցեր ունեն եւ ինչ է քննարկվում: Ի՞նչ է նշանակում՝ ուղիղ կապ պաշտպանության նախարարների միջեւ, ո՞րն է այդ օրակարգը եւ այլն»:
Ըստ Արտակ Զաքարյանի, Նիկոլ Փաշինյանն այսպիսով այժմ էլ փորձում է ողջ բեռը բարդել հանձնաժողովների վրա՝ քողարկելով այն, որ ըստ վարչապետի պատկերացումների, ՀՀ-ն ասելիք եւ անելիք չունի եւ ՀՀ-ն, որպես սուբյեկտ, գոյություն չունի:
Կարդացեք նաև
Անդրադառնալով Նիկոլ Փաշինյանի այն հայտարարությանը, թե իրենք միլիմետրի ճշտությամբ գիտեն, թե ՀՀ սահմանները որտեղով են անցնում, իսկ մնացածը բանակցությունների հարց է, Արտակ Զաքարյանը հակադարձում է. «Եթե միլիմետրի ճշտությամբ գիտենք՝ որտեղով է անցնում, էլ ի՞նչ բանակցություն, ի՞նչ հանձնաժողով, ի՞նչ օկուպացիա, ի՞նչ ագրեսիա»:
Արտակ Զաքարյանը նաեւ նկատում է, որ եթե Նիկոլ Փաշինյանը խոսում է այն մասին, որ միջազգային հանրությունը պետք է զբաղվի ՀՀ 41 քառակուսի կիլոմետր օկուպացված տարածքի հարցով, ապա ինքը՝ իբրեւ երկրի ղեկավար, որը մայիսի 12-ից խոսում է այդ մասին, առնվազն պետք է հրաժարվի այլ աշխարհաքաղաքական գործընթացների մասնակցելուց եւ բացառապես այդ հարցին հետամուտ լինի: Մինչդեռ այն, ինչ այսօր տեղի է ունենում, Արտակ Զաքարյանի բնութագրմամբ, միջազգային հանրության կողմից չի լինելու աջակցություն՝ իրավիճակը բալանսավորելու համար:
Մանրամասները՝ տեսանյութում
Նելլի ԳՐԻԳՈՐՅԱՆ
