Սահմանադրական դատարանն այսօր բանավոր ընթացակարգով սկսել է քննել ՀՀ ԱԺ պատգամավորների ընդհանուր թվի առնվազն 1/5-րդի դիմումի հիման վրա՝ «ՀՀ բնակչության սանիտարահամաճարակային անվտանգության ապահովման մասին» ՀՀ օրենքի 20.1-ին հոդվածի 3-րդ մասի, 22-րդ հոդվածի 3-րդ պարբերության եւ ՀՀ առողջապահության նախարարի 2021թ․ օգոստոսի 20-ի N 65 հրամանի՝ Սահմանադրությանը համապատասխանության հարցը որոշելու վերաբերյալ գործը։
Հիշեցնենք՝ «Հայաստան» դաշինքն ավելի վաղ հայտարարել էր, դիմելու է ՍԴ՝ վիճարկելով առողջապահության նախարարի այն հրամանի՝ սահմանադրությանը համապատասխանելու հարցը, համաձայն որի՝ հանրային աշխատողները կամ պետք է պատվաստվեն կորոնավիրուսի դեմ, կամ 14 օրը մեկ ներկայացնեն ՊՇՌ թեստի բացասական պատասխան։
Գործով որպես պատասխանող է ներգրավված առողջապահության նախարար Անահիտ Ավանեսյանը։
Հարցի զեկուցող-դատավոր Էդգար Շաթիրյանը նախ հայտարարեց, որ այս ընթացքում նախարարին խնդրել է տրամադրել մի շարք տեղեկություններ եւ փաստաթղթեր, այդ թվում՝ ներկայացնել ամբողջական պատվաստված եւ մեկ դեղաչափ պատվաստված անձանց թիվը։ Շաթիրյանի խոսքով՝ նախարարը նոյեմբերի տասնմեկին հայտնել է, որ անհրաժեշտ է լրացուցիչ ժամանակ․ երեկ էլ ստացվել է գրություն, որ նշյալ հրամանով սահմանված շրջանակների մոտ Armed էլեկտրոնային համակարգից ստացված տվյալների համաձայն գրանցվել են հետեւյալ թվերը․
Կարդացեք նաև
Պատվաստված, թեստավորված աշխատակիցներ-366 382
1 դեղաչափ պատրաստված աշխատակիցներ-311 380
2 դեղաչափ պատվաստված աշխատակիցներ-182 633
90 օրյա ժամկետում առողջացած աշխատակիցներ՝ 19 011։
ՍԴ դատավոր Արեւիկ Պետրոսյանն Էդգար Շաթիրյանից հետաքրքրվեց՝ այս տվյալները ներառո՞ւմ են պատվաստումների մասին կեղծված տվյալները եւ արդեն իսկ մահացած մարդկանց թիվը։ Էդգար Շաթիրյանը նկատեց, որ նախարարն է հասցեատերը․ «Եթե հիշողությունս չի դավաճանում, նախարարությունը նշել է, որ կեղծ փաստաթղթերի ստուգման գործիքակազմ չունեն։ Քրեական գործեր են հարուցված»։
Շաթիրյանը նաեւ հայտնեց՝ նախարարությունից նաեւ հարցրել են, թե նախարարությունն ի՞նչ լիազորություն ունի թեստավորումների լաբորատոր ոչ միասնական գնային քաղաքականության վերաբերյալ․ «Պատասխանել են, որ գնային քաղաքականությունը դուրս է նախարարության լիազորություններից, քանի որ թեստավորումներն իրականացնում են մասնավոր լաբորատորիաները»։
Լուիզա ՍՈՒՔԻԱՍՅԱՆ
