Նոյեմբերի 10-ից հետո ՀՀ տարածքներ հայտնվե՞լ են ադրբեջանական վերահսկողության ներքո, թե՞ ոչ, եթե այո, ինչպե՞ս բալանսը չի փոխվել, ինչպես հայտարարել էր ԱԺ-ում: Այսօր ֆեյսբուքյան էջի ուղիղ եթերում պատասխանելով այս հարցին՝ վարչապետ Նիկոլ Փաշինյանն ասաց. «Այո, 2020-ի նոյեմբերի 10-ից հետո 40-45 քկմ հայտնվել են Ադրբեջանի վերահսկողության ներքո եւ դա մայիսի 12-ին Ադրբեջանի հայտնի ներխուժումն է, որը միջազգային հանրությունը դատապարտվել է: Մենք հենց դա ենք ասում, որ այդ ագրեսիան պետք է վերացվի: Բալանսը իհարկե փոխվել է»:
Հարցին՝ ի՞նչ տեղեկություններ ունեք այն 24 զինծառայողների մասին, որոնց հետ կապը, ՊՆ հաղորդմամբ, ընդհատվել էր՝ Փաշինյանը պատասխանեց. «Չճշտված տեղեկություններով՝ այդ զինծառայողները գերեվարվել են: Չճշտված տվյալների համաձայն, ավելի մեծ թվով զինվորներ են գերեվարվել: Մի մասը, որ մենք մտածում էինք, որ զոհված են, իրականում գերեվարված են՝ չճշտված տեղեկությունների համաձայն»:
Փաշինյանը ի մի բերեց տվյալները՝ ունենք 6 հաստատված զոհ, ունենք 24+8 գերեվարված: Գերեվարվածների մեջ կան վիրավորներ, որոնցից առնվազն մեկը թեթեւ վնասվածք չի ունեցել: Մի իրավիճակում է գերեվարվել, երբ ինքը չէր կարող դիմադրել. «Մենք նրանց բոլորի վերադարձի ուղղությամբ շատ ինտենսիվ աշխատում ենք»:
Գերիներին քրեական հետապնդման ենթարկելու իր աղմկահարույց հայտարարության հետ կապված Փաշինյանն ասաց. «Եթե զինվորը գերի է ընկել, բա չքննե՞նք ինչ հանգամանքներում է գերեվարվել: Քրեական գործեր պետք է հարուցվեն: Ի վերջո կա օրենք եւ օրինականություն, պետք է յուրաքանչյուր դեպք բնորոշվի օրենքի եւ օրինականության զինվորական երդման հարաբերության մեջ»: Նա ասաց. «Այնպես չստացվի, որ գերի ընկնելը….մենք գիտենք մի իրավիճակ, երբ զինծառայողը հերոսաբար կռվել է, պաշտպանել իր հայրենիքը եւ մեծ հավանականությամբ անգիտակից, դիմադրության ոչ ընդունակ վիճակում գերի է հանձնվել: Զենքը կորցնելու համար կա որոշակի ընթացակարգ, դա քրեական պատասխանատվություն է ենթադրում: Մոռանա՞նք, որ պետություն ենք, չենք մոռանալու, ինչքան էլ շատ ուժեր կան, որ ուզում են այդպես տեղի ունենա: Բա զինվորական երդումը ոչ մի բան չնշանակող բա՞ն է: Պետք է ամեն դեպք քննվի, որտեղ կա քրեական պատասխանատվության հիմք, պետք է հետեւի, որտեղ չկա՝ չպետք է հետեւի»:
Կարդացեք նաև
Հռիփսիմե ՋԵԲԵՋՅԱՆ
