«Ադրբեջանի պահվածքը պետք է լայնորեն դառնա քննարկման առարկա ոչ միայն եռակողմ ֆորմատում, ՀԱՊԿ-ում, ՄԱԿ-ում, Հաագայի դատարանում, ՄԻԵԴ-ում, ես առաջիկայում պատրաստվում եմ մասնակցել նաեւ Ժողովրդավարության գագաթնաժողովին, նաեւ այնտեղ եմ պատրաստում այս հարցը»,- այսօր ֆեյսբուքյան էջի ուղիղ եթերում ասաց վարչապետ Նիկոլ Փաշինյանը՝ պատասխանելով ԶԼՄ-ների եւ ՀԿ ներկայացուցիչների հարցերին:
Նա հավելեց. «Այն, ինչ անում է Ադրբեջանը, դա հարձակում է նրա ու նրան քաջալերող երկրների՝ ՀՀ ինքնիշխանության, անկախության եւ նաեւ ժողովրդավարության վրա: Մենք այս հարցը պատրաստվում ենք հետապնդել միջազգային բոլոր հարթակներում, մենք մեզ չենք սահմանափակելու»:
Փաշինյանն ասաց, որ սա արդեն միայն ՀՀ-ի եւ Ադրբեջանի հարցը չէ. «Ասենք, Ադրբեջանի նախագահը հայտարարում է՝ որտեղ ուզենք՝ կկանգնենք, սա ի՞նչ է նշանակում: Մենք պետք է հասկանանք նաեւ միջազգայնորեն, նոր աշխարհակա՞րգ է գործում, որտեղ ով որտեղ ուզենա՝ կկանգնի: Սա նշանակում է, որ որեւէ երրորդ երկիր Ադրբեջանի տարածքում որտեղ ուզենա՝ կկանգնի՞»:
Փաշինյանն ասաց, որ երկու կողմերի պաշտպանությանն նախարարների միջեւ կոմունիկացիա է ձեւավորվում. «Ես մեր ՊՆ նախարարին հանձնարարել եմ, որ ակտիվորեն այդ կոմունիկացիան օգտագործի եւ Ադրբեջանի հրադադարի խախտման դեպքերի կոմունիկացիան փոխանակի Ադրբեջանի ՊՆ նախարարի հետ ու նույնը անի Ադրբեջանի ՊՆ նախարարը»: Ըստ Փաշինյանի, այդպես ակնհայտ կդառնա, թե ով է ավելի շահագրգիռ սադրանքների մեջ: Նա ասաց, որ պատրաստ է Ալիեւի հետ քննարկմանը Բրյուսելում էլ, այլ տեղերում էլ. «Բայց պետք է հասկանանք, որ քննարկման առաջին թեման պետք է լինի իրադրության շուրջ գնահատականներն ու քննարկման արդյունքում պետք է պարզվի՝ ով է շահագրգիռ իրավիճակի ապակայունացմամբ»:
Կարդացեք նաև
Վարչապետը կարճ ու հպանցիկ անդրադարձավ գաղտնի փաստաթղթին. «Շատ խոսվում է դեմարկացիայի եւ դելիմիտացիայի մասին, հարց է բարձրացվում, թե ինչ փաստաթուղթ է դրված սեղանին, փորձ է արվում ներկայացնել, թե դա ՀՀ շահերին հակասում է: Դեմարկացիայի եւ դելիմիտացիայի հետ կապված պայմանավորվածությունը կլինի թե չի լինի կերեւա առաջիկայում»:
Հռիփսիմե ՋԵԲԵՋՅԱՆ
