Մոսկվան ի՞նչ առաջարկներ է արել Երեւանին սահմանազատման, սահմանագծման աշխատանքների հետ կապված, որոնք ընդունելի են Հայաստանի վարչապետի համար: Այսօր լրագրողների այս հարցին ի պատասխան՝ ԱԺ պաշտպանության եւ անվտանգության հարցերի հանձնաժողովի նախագահ Անդրանիկ Քոչարյանն ասաց. «Եթե ՀՀ վարչապետի համար բոլոր առաջարկներն ընդունելի են, դա նշանակում է, որ այդ առաջարկները ընդունելի լինելով՝ բխում են մեր շահերից, դրանով ամեն ինչ ասված է: Դա կապված է նաեւ այն քարտեզների հետ, որ ձեզ բոլորիդ անընդհատ հետաքրքրում են: Եթե Հայաստանի վարչապետն ասում է, որ ընդունելի է, դա նշանակում է, որ զրոյական կետն է չէ՞ ընդունելի: Ուրեմն այդ կետի գոյությունը ամրապնդվում է: Անմիջապես կմտնենք սահմանազատման, սահմանագծման կետի դաշտ: Դա այն հենքն է, որտեղից պետք է ասես՝ այս գիծը որտեղո՞վ պետք է անցնի, անցե՞լ է, թե՞ չի անցել: Տեսեք, դուք ասում եք՝ ո՞ր թվականի քարտեզով: Կան քարտեզներ, որոնք պետք է ունենան իրավական հիմք՝ հաստատված ինչ-որ միջազգային կառույցների կողմից: Իհարկե, 1920-ականների քարտեզը, որն ունի իրավական հիմք, մեզ տալիս է բավականին բանակցելու եւ ակնկալիք ունենալու հնարավորություն: Ո՞նց պետք է այդ պրոցեսը գնա: Շատ հասարակական կառույցներ կան, որ ասում են՝ չէ, բերեք մեզ հետ համաձայնեցրեք, թե չէ գնում ենք փողոց փակելու: Բերեք տեսնենք՝ այդ ի՞նչ քարտեզներ են»:
Հարցին՝ մարդիկ իմանալու իրավունք չունե՞ն՝ Քոչարյանը պատասխանեց, որ գաղտնի չի մնալու, բայց գործընթացի ժամանակ շատ բան լինելու է գաղտնի. «Դուք մտածո՞ւմ էիք ինչ են բանակցում նախկին արտգործնախարարները կամ նախկին նախագահները՝ նախկին ֆուտբոլային դիվանագիտության պրոցեսում»:
Լրագրողները հիշեցրին՝ ձեր իշխանությունը այլ խոստումներ էր տալիս ու եկել էր՝ բացահայտելու՝ Անդրանիկ Քոչարյանը պատասխանեց. «Մեր իշխանությունը այնուամենայնիվ պահել է ամենակարեւոր խոստումը՝ ինքը ժողովրդի թիկունքում որեւէ բան չի անելու, դրա համար էլ ստացել է այդ քվեն»:
Կարդացեք նաև
Հռիփսիմե ՋԵԲԵՋՅԱՆ
