Այսօր ԱԺ պաշտպանության եւ անվտանգության հարցերի հանձնաժողովի նիստում «Հայաստան» խմբակցության պատգամավոր Արթուր Ղազինյանին արդեն 13-րդ անգամ հանձնաժողովի փոխնախագահի պաշտոնում ընտրելու հարցն էր քննարկվում:
Հանձնաժողովականները նախ «Հայաստան» խմբակցության պատգամավոր Գեղամ Մանուկյանի առաջարկով 1 րոպե լռությամբ հարգեցին երեկ Գեղարքունիքի մարզի Նորաբակ գյուղի հատվածում հակառակորդի կրակոցից զոհված Սուրեն Սաֆարյանի հիշատակը:
Գեղամ Մանուկյանը հայտարարեց, որ պաշտոնական տեղեկատվությունն ամբողջական չէ, մարդիկ չեն ինֆորմացվում ու երեսը թեքում են ադրբեջանական լրատվամիջոցներին. «Աննախադեպ է, որ ՊՆ-ն հաղորդագրություն է տարածում, որ կան զոհեր, չի հրապարակվում թիվ, չեն հրապարակվում անուններ: Դրա արդյունքում նաեւ հանրության, առաջնագծում ծառայող ունեցող ծնողների մեջ ստեղծվում է հուզական վիճակ: Իշխանական ԶԼՄ-ներով թվեր են հրապարակվում, ստեղծվում է խառնաշփոթ: Հանձնաժողովի նախագահը պետք է արտահերթ նիստ հրավիրեր՝ հենց այս հարցերը քննարկելու, կամ գոնե արտագնա նիստ կազմակերպելու»:
Ի պատասխան՝ Անդրանիկ Քոչարյանն ասաց, որ հանձնաժողովի առանձին անդամներ եղել են թե՛ առաջնագծում, թե՛ մշտական գործունեություն են ծավալում անվտանգության ոլորտի բազմաթիվ կառույցների հետ: Ավելին՝ նա հորդորեց, որ Գեղամ Մանուկյանն ինքը ընդգրկվի այդ աշխատանքներում:
Կարդացեք նաև
Իսկ ՔՊ պատգամավոր Վահագն Ալեքսանյանն ասաց. «Ձեզ սպասարկող ԶԼՄ-ներն են իրենց երեսը թեքում ադրբեջանական լրատվամիջոցներին, այդ ձեզ սատարող ԶԼՄ-ներն են, որ ադրբեջանական ԶԼՄ-ների տարածած ամենազազրելի բան բերում մտցնում են հայկական դաշտ: Ձեզ սատարող ԶԼՄ-ներն են, որ հայ գերիների՝ ոչ պատշաճ վիճակում վիդեոներ են հրապարակում մարտերի բուն ընթացքում: Ձեր ներկայացրած պաշտպանության հանձնաժողովի նախագահի թեկնածուն է, որ իր էջում կիսվում է ապատեղեկատվությամբ, թե իբր զոհված հայ զինվորը ադրբեջանցի գերիներ հետ տանելուց գերի է ընկել, ծեծելով սպանել են: Պարոն Ղազինյանը դա չի՞ կիսվել, չի՞ տարածել: Դո՛ւք եք ապատեղեկատվության աղբյուրը, էլ չասած, որ մարտերի ընթացքում հավաք եք անում, իշխանափոխություն եք անում, դա՛ է աննախադեպը»:
Գեղամ Մանուկյանը հակադարձեց, սկսեցին բանավիճել:
Ավելի ուշ քվեարկությամբ Արթուր Ղազինյանը հերթական՝ 13-րդ մերժումը գրանցեց՝ չընտրվելով փոխնախագահի պաշտոնում:
Հռիփսիմե ՋԵԲԵՋՅԱՆ
