«Ես դիմում եմ ամբողջ աշխարհի հայերին՝ բոլորս պետք է արթնանանք եւ տեր կանգնենք մեր սահմանադրական իրավունքին, կա նաեւ մեր պետական եւ ազգային իրավունքը: Մենք իրավունք ունենք իմանալու, թե ինչ է կատարվում, ինչ է կատարվել եւ ինչ է կատարվելու մեզ հետ: Այսօր մենք ապրում ենք ժողովրդավարական հանրապետության մեջ: Լինելով ժողովրդավար պետություն՝ այսօր մեծամասնությունը չի իմանում ինչ է կատարվում: Ես, իմ ընկերները, բոլորս այստեղ ենք՝ որպես ժողովրդի մի մասնիկ»,- այսօր Հանրապետության հրապարակում «5165» շարժման նախաձեռնությամբ բողոքի ցույցի ժամանակ ասաց երգիչ Արսեն Գրիգորյանը՝ Մրոն:
Հիշեցնենք, որ ցույցը ՀՀ-ի եւ Ադրբեջանի միջեւ սահմանազատման եւ սահմանագծման ստորագրվելիք փաստաթուղթը հրապարակելու պահանջով է:
A protest action demanding not to sign the demarcation and delimitation program and publicly present what documents and conditions have being discussed with Azerbaijan took place in front of the RA Government’s building
Կարդացեք նաև
Արսեն Գրիգորյանը հորդորեց. «Անընդհատ ասում ենք՝ միասնականություն, ահա՛ միասնականության քայլ: Կա համաժողովրդական պահանջ, մենք բոլորս պահանջում ենք հանրայնացվեն այն փաստաթղթերը, որոնք պիտի ստորագրվեն, որոնք կապ ունեն մեր բալիկների, ապագա սերունդների կյանքի, մեր զինվորների վիճակի հետ: ժամանակն է արթնանալ, հերի՛ք է մտածենք մեր անձնական խնդիրների մասին: Պետք է գերակայություն լինեն պետական ու ազգային խնդիրները: Տեր կանգնենք մեր երկրին, մեր իրավունքներին ու մեր ապագային: Կողքը լինենք մեր զինվորի, որը հենց հիմա սահմանը պահպանում է: Պետք է համալրել զինվորների շարքերը: Հենց այսօր իմ տղան ծառայում է Արցախում, եկեք տեր կանգնենք իմ տղային, բոլորի տղաներին: Սա է մեր առաջնային խնդիրը, ուրիշ խնդիր չունենք, ինչ ենք ուտելու, ինչ ենք խմելու՝ դա այնքան կարեւոր չի: Կարեւոր է մեր ապագան: Տեսնում ենք ինչ է կատարվում՝ անտերություն է, որտեղից ուզում՝ մտնում են: Թող վերազինեն մեր բանակը, ուժեղացնեն մեր բանակը: Մեր զինվորը հզոր է, սակայն տեխնիկական համալրում է պետք: Պետք է մեր զինվորին ապահովել ժամանակակից, արդիական զենքերով: Խնդրում եմ, եկեք բոլորս իրար ձեռք բռնենք, մենք ուրիշ ճար չունենք, անճարությունից պետք է միանանք իրար: Մեր պատմության մեջ բոլոր մեծերը կոչ են արել միասնականության Կողքի դրեք բոլոր խնդիրները, եկեք իրար հետ միանանք եւ տեր կանգնենք մեր երկրին, մեր ժողովրդին»,- ասաց Արսեն Գրիգորյանը:
Շարժման անդամները դժգոհում էին, որ ժողովրդին ասվել է, թե խաղաղության դարաշրջան է բացվում, բայց ժողովրդին չի ասվել դրա գինը:
Հռիփսիմե ՋԵԲԵՋՅԱՆ
