«Երբ ասում էին՝ Արցախը Հայաստանի դարպասն է, շատերը երեւի չէին գիտակցում դրա կարեւորությունը: Այսօր Արցախի մեծ մասը կորցրել ենք ու տեսնում ենք, որ խնդիրը հասել է ՀՀ սահմաններին: Ցավոք, մենք ունեցանք զոհեր եւ գերիներ: Այսօր մենք տեսնում ենք, որ մեր զինվորին թիկունք չեն կանգնում: Քաջ գիտակցում ենք, որ մեր զինվորները չեն պարտվել, փողկապով, թուղթ ու գրիչով մարդիկ են հանձնել տարածքները»,- այսօր Հանրապետության հրապարակում «5165» շարժման նախաձեռնությամբ բողոքի ցույցի ժամանակ ասաց Արա Զոհրաբյանը: Նա հորդորեց օրհասական պահին միասնական լինել:
Հիշեցնենք, որ ցույցը կազմակերպվել է՝ ՀՀ-ի եւ Ադրբեջանի միջեւ սահմանազատման եւ սահմանագծման ստորագրվելիք փաստաթուղթը հրապարակելու պահանջով:
Արա Զոհրաբյանն ասաց, որ մեր հարցն այսօր լուծում են գերտերությունները՝ առանց մեզ ու երբ դրսից տեսնում են, որ ժողովուրդն անտարբեր է, ժողովրդին հետաքրքիր չէ, թե ինչ է կատարվում երկրի ներսում, շատ ավելի հեշտ է լինելու կտրտել մեզ. «Երբ որ ժողովուրդը ոտքի է կանգնում, ուզեն-չուզեն՝ հաշվի են նստելու: Գիտեն՝ այս ժողովուրդը երբ մռնչաց՝ բոլորին քշելու ու տանելու է»:
Նա ասաց, որ այսօր ժամը 17-ին լինելու են հրապարակում:
Կարդացեք նաև
Հռիփսիմե ՋԵԲԵՋՅԱՆ
