Այսօր Հանրապետության հրապարակում «5165» շարժման նախաձեռնությամբ բողոքի ցույց էր կազմակերպվել՝ ՀՀ-ի եւ Ադրբեջանի միջեւ սահմանազատման եւ սահմանագծման ստորագրվելիք փաստաթուղթը հրապարակելու պահանջով:
Շարժման առաջնորդ Կարին Տոնոյանը հայտարարեց, որ այսօրվանից սկսում են անհնազանդության ցույցերը ու ներկայացնելու են իրենց պահանջները. «Մեկ տարի միայն խոսում ենք, ժամանակն է գործի անցնել»: Նա ասաց, որ համագործակցելու են ընդդիմադիր դաշտի այլ անդամների հետ. «Մեկ տարի ամեն ինչ արեցին, որ մեկս մյուսին չվստահենք: Հիմա վստահելու ենք իրար, բոլոր այն ուժերին, որոնց համար այս պայքարը վերքաղաքական, վերկուսակցական է, հայրենիքի համար պայքար է եւ բոլոր այն ուժերին, որոնք Հայաստանի ճակատագիրը չեն տեսնում որեւէ այլ ուժի տակ, տեսնում են անկախ, ինքնիշխան Հայաստան: Խորհրդարանական ընդդիմությունից մենք պահանջելու ենք, որ Ազգային ժողովում կատարեն իրենց դերը»:
Կարդացեք նաև
Շարժման նախաձեռնողները կառավարության դիմաց կանգնած՝ ներկայացրեցին իրենց պահանջը. «Փաստաթղթի վերաբերյալ ունենք հիմնավոր կասկածներ, որ ՀՀ-ից թշնամուն են զիջվելու կենսական տարածքներ, ռազմավարական կապուղիներ ու բարձունքներ, իսկ Արցախը ճանաչվելու է Ադրբեջանի մաս: Մեր մտահոգությունները ավելանում են, քանի որ նշված փաստաթղթի բովանդակության բացահայտմանն ուղղված թե՛ խորհրդարանական եւ թե՛ արտախորհրդարանական նախաձեռնությունները տապալվում են: ՀՀ Սահմանադրության համաձայն, ՀՀ տարածքի փոփոխությանը վերաբերող հարցերը լուծվում են բացառապես հանրաքվեի միջոցով: ՀՀ ԳԽ 1992-ի հուլիսի 8-ի որոշմամբ, ՀՀ-ի համար անընդունելի է միջազգային կամ ներպետական ցանկացած փաստաթուղթ, որտեղ ԼՂ-ն նշված կլինի Ադրբեջանի կազմում: Ելնելով նշվածից՝ կառավարությունից պահանջում ենք ներկայացնել Նիկոլ Փաշինյանի նշած փաստաթղթի բովանդակությունը»:
Դիմումը շարժման անդամները փոխանցեցին կառավարություն:
Հռիփսիմե ՋԵԲԵՋՅԱՆ
