«Հայաստան» դաշինքի պատգամավոր Արմեն Չարչյանի գործով հերթական դատական նիստում այսօր նրա պաշտպան Էրիկ Ալեքսանյանը դատարանին միջնորդեց դիմել ՍԴ՝ քրեական դատավարության օրենսգրքի երկու հոդվածների՝ ՀՀ սահմանադրությանը համապատասխանության հարցը որոշելու նպատակով։
Պաշտպանը նշեց, որ քրեական դատավարության օրենսգիրքը նախատեսում է ընթացակարգ՝ մինչեւ պատգամավորի կարգավիճակ ձեռքբերելը դատախազի կողմից դիմելու ԱԺ եւ ստանալու համապատասխան թույլտվություն՝ պատգամավորի հանդեպ քրեական հետապնդում հարուցելու եւ ազատությունից զրկելու համար․ «Դա միջդատական վարույթն է։ Սակայն դատաքննության փուլում, երբ անձը արդեն ձեռք է բերում պատգամավորի կարգավիճակ, իսկ քրեական հետապնդումը շարունակվում է, չկա նախատեսված ընթացակարգ, որ անձի՝ պատգամավորական անձեռնմխելիությունը պետք է հաղթահարվի, որպեսզի նրա հանդեպ քրեական հետապնդումը շարունակվի։ Երբ հարուցվել էր քրեական գործ, Արմեն Չարչյանը դեռեւս չուներ պատգամավորական անձեռնմխելիություն։ Երբ ձեռք բերեց պատգամավորի կարգավիճակ, որը նոր է եւ հավասար չէ պատգամավորի թեկնածուի կարգավիճակին, դրանից հետո քրեական հետապնդումը շարունակելու տեսանկյունից չի հաղթահարվել նրա պատգամավորական անձեռնմխելիությունը։ Նոր կարգավիճակի ձեռքբերումից հետո անձեռնմխելիության հաղթահարման մեխանիզմ չնախատեսելն օրենսդրական բաց է, որը կարող է լուծել միայն ՍԴ-ն»։
Կարդացեք նաև
Այս գործով մեղադրող դատախազն առարկեց՝ նշելով, որ այս փուլում չի քննարկվում Արմեն Չարչյանի խափանման միջոցի հարցը։
Հիշեցնենք, որ «Հայաստան» դաշինքի պատգամավոր, «Իզմիրլյան» ԲԿ նախկին ղեկավար, վիրաբույժ Արմեն Չարչյանին մեղադրանք է առաջադրվել ՀՀ ՔՕ 154.2-րդ հոդվածի 4-րդ մասի 2-դ կետի հատկանիշներով (ընտրողներին կաշառք տալը, կաշառք ստանալը, ընտրությունների ժամանակ բարեգործության արգելքի խախտումը կամ ընտրողի ազատ կամքի իրականացմանը խոչընդոտելը): Նա մեղադրանքը չի ընդունում։
Դատարանը հեռացավ խորհրդակցական սենյակ, որոշումը կհրապարակվի վաղը 12:00-ին։
Լուիզա ՍՈՒՔԻԱՍՅԱՆ
