«21-րդ դարում, երբ մենք հաղթահարել ենք ցեղասպանության զոհի բարդույթը եւ ունեինք նաեւ հաղթանակած ազգի կարգավիճակ, մեզ նորից փորձում են տեղափոխել ցեղասպանվածի, առանց հայրենիքի, առանց պետության ազգի կարգավիճակի, եթե դրանից հետո դա կոչվելու է ազգ»,-այսօր «Հայելի» մամուլի ակումբում ասել է «Երկիր ծիրանի» կուսակցության նախագահ Զարուհի Փոստանջյանը եւ հանրությանը դիմադրությանը միանալու կոչ արել:
Տիկին Փոստանջյանը նաեւ ասել է, որ իր տեղեկություններով՝ ներկայումս Սյունիքում շրջափակման մեջ հայտնված գյուղերի բնակիչները ամեն գիշեր մտայնություն ունեն, թե թուրքը ուր որ է կներխուժի: «Ես այդ գյուղեր այցելել եմ եւ գիտեմ, թե ինչպես դրանք պետք է շրջապատման մեջ գտնվեին: Հիմա պետք է մի կողմ դրվի կուսակցություն, նախկին, ներկա, ապագա… Բոլորը պետք է իջնեն հրապարակ: Երեւանում եւ մյուս քաղաքներում հրապարակները պետք է լինեն բազմամարդ, վերածվեն միասնության հրապարակների՝ ընդդեմ զավթողականության:
Այսօր կառավարության շենքում նստած անձը պատրաստ է ամեն ինչ տալ, միայն թե մնա այդ պաշտոնին, որովհետեւ ուրիշ տարբերակ այլեւս չունի: Կամ պետք է մնա պաշտոնին, կամ պետք է ընդհանրապես չլինի: Նա այլընտրանք չունի: Բայց մենք էլ այլընտրանք չունենք: Կամ մենք պետք է հնարավորություն ունենանք մեր հայրենի հողում արժանապատիվ ապրելու, կամ պետք է ցեղասպանվենք, իսկ լավագույն դեպքում՝ քոչենք Հայաստանից»,- հայտարարել է «Երկիր ծիրանի» կուսակցության նախագահը:
Աշոտ ՀԱԿՈԲՅԱՆ
