Հայաստանում կորոնավիրուսային իրավիճակը շարունակում է մնալ լարված, թեեւ նկատվում է նոր դեպքերի 40-50% նվազում։ Այս մասին այսօր «Արմենպրես»-ի մամուլի սրահում հրավիրված ասուլիսում ասաց ԱՆ հիվանդությունների վերահսկման եւ կանխարգելման ազգային կենտրոնի վարակիչ եւ ոչ վարակիչ հիվանդությունների համաճարակաբանության վարչության պետ Ռոմելլա Աբովյանը:
Նրա խոսքով՝ նոր դեպքերի թվի նվազումը պայմանավորված է երկու շաբաթ առաջ ուսումնական հաստատությունների արձակուրդներով, սակայն ուսումնական հաստատությունների վերաբացմամբ՝ կա վարակի տարածման ռիսկի ավելացում։
Ըստ տիկին Աբովյանի՝ այսօր վարակի վերարտադրողականության ցուցանիշը 1-ից ցածր է, կազմում է 0.5-0.6․ «Այսինքն՝ վարակի տարածման տեմպերը դանդաղել են։ Հույս ունեմ, որ բնակչությունը հակահամաճարակային կանոնները կպահպանի, ավելի շատ մարդիկ կպատվաստվեն եւ վերջապես կգա մի ժամանակ, որ մենք կկարողանանք գոնե վերահսկել այս հիվանդությունը»։
Ռոմելլա Աբովյանն ասաց, որ նախատեսվում է դեկտեմբերի 1-ից նոր փոփոխություն մտցնել՝ աշխատողների համար ՊՇՌ թեստի ցուցանիշ ներկայացնելու պահանջը, որն այսօր 14 օրը մեկ է, կդառնա 7 օրը մեկ:
Կարդացեք նաև
Անդրադառնալով պատվաստման կեղծ հավաստագիր ձեռք բերելու դեպքերին, տիկին Աբովյանն ասաց՝ երբ անձը ձեռք է բերում կեղծ հավաստագիր, այնուհետեւ հիվանդանում կամ մահանում ցուցանիշների իրական պատկերը խեղաթյուրվում է․ «Կան հանձնաժողովներ, որոնք աշխատում են այդ ուղղությամբ»։
Նելլի ԲԱԲԱՅԱՆ
