Այսօր վաղ առավոտից Երեւանում փողոցներ են փակվել: Ցուցարարները այսպիսով քաղաքացիների ուշադրությունն են փորձում հրավիրել Հայաստանում եւ Հայաստանի շուրջ ստեղծված իրավիճակին եւ հանգուցալուծումները գտնելու համար 17.00-ին հրավիրում են Հանրապետության հրապարակ:
Հիմնական պահանջներն են.
«- կանխել սահմանագծման և սահմանազատման հակահայկական ծրագիրը, այդ թվում՝ պահանջելով հրապարակել ստորագրման ներկայացված փաստաթղթերը,
Կարդացեք նաև
– թույլ չտալ միջանցք տրամադրել թշնամուն,
– պահանջել, որ Հայաստանի իշխանությունները լիարժեք զինեն առաջնագիծը և պաշտպանեն ՀՀ տարածքային ամբողջականությունը»:
Ոստիկանները փորձում են ցուցարարներին հեռացնել, նրանցից մեկն ուղիղ հարց տվեց ոստիկաններին. «Դուք թուրքերի դեմ ե՞ք: Սա թուրքերի դեմ է, ախպերս, նրանք փորձում են մեր 18 տարեկան տղաներին սպանել»:
«Սա իրազեկման ակցիա է: Մենք գիտենք, որ սահմանագծման-սահմանազատման հետ կապված հակահայկական ծրագիր է իրականացվում, մենք, այսօր, այսպիսով, ուզում ենք ժողովրդին արթնացման կոչ անենք: Այսօր ժողովրդի մեջքի ետեւում հերթական անգամ ազգակործան գործ են անում. սահմաններում, մեր զինվորներին չեն զինել պատշաճ, աշխարհազորը չեն ձեւավորել: Ժողովուրդ ջան, պետք է արթնանա՞նք, թե՞ ոչ, այնքան ենք քնել, որ արդեն գերտերություններն առանց մեզ իրենք են որոշում, թե մեր հետ ի՞նչ անեն»,- ասաց «Զարթոնք» կուսակցության ղեկավար, փաստաբանների պալատի նախկին նախագահ Արա Զոհրաբյանն, որը փողոց փակողների շարքերում է:
Հիշեցնենք, նոյեմբերի 20-ին Գորիսում կայացած հանրահավաքում տրվեց Գորիսի անվտանգության խորհրդի ստեղծման մեկնարկը ։ Գորիսի մտավորականության հետ հավաքին մասնակցեցին լրագրող-վերլուծաբան Նաիրի Հոխիկյանը, նախկին պատգամավոր Սոֆյա Հովսեփյանը, որոնք հանրապետության այլ մարզերի բնակիչների հետ ավտոերթով հասել էին Գորիս։ Արա Զոհրաբյանը նույնպես խորհրդի անդամ է:
Արա Զոհրաբյանը հայտարարեց, որ փողոցները 44 րոպեով են փակել՝ նեղություն տալով մարդկանց եւ այդպիսով փորձելով արթնացնել դիմադրության շարժում, քանի որ, եթե անգամ իշխանության ներկայացուցիչներն այսօր գնում են բանակցությունների, պետք է շատ հստակ իմանան, որ ժողովուրդը պահանջատեր է:
Իսկ ոստիկանության գործողությունները Արա Զոհրաբյանն այսպես բնութագրեց. «Առանց իրավական հիմքերի խոչընդոտում են մեր ակցիան»:
Նելլի ԳՐԻԳՈՐՅԱՆ
