Ապրիլյան քառօրյա պատերազմի մասնակից Մանուել Մանուկյանը հրավիրվել է Երևան քաղաքի քննչական վարչության ծանր հանցագործությունների քննության բաժին։ Այս մասին Մանուել Մանուկյանը տեղեկացրել է ֆեյսբուքյան գրառմամբ:
Մանուել Մանուկյանը ծանուցագրից է իմացել, որ իր նկատմամբ քրեական գործ է հարուցված՝ անձին ծանր վիրավորանք հասցնելու, հայհոյելու կամ նրա արժանապատվությունն այլ ծայրահեղ, անպարկեշտ եղանակով վիրավորելու դեպքի առիթով: Ի դեպ, նոյեմբերի 12-ին քննչական վարչություն ներկայանալու մասին ծանուցագիրը Մանուել Մանուկյանը ստացել է նոյեմբերի 18-ին: Քրեական գործը հարուցված է իր ֆեյսբուքյան գրառումներից մեկի հիմքով, որտեղ նա Նիկոլ Փաշինյանին է անվանարկել: Նա պնդում է, որ իր գրառման մեջ վիրավորանք, առավել ևս հայհոյանք, չկա: Aravot.am-ի հետ զրույցում, Մանուել Մանուկյանն ասաց, որ իր գնահատմամբ, կոնկրետ այդ գրառումը էական նշանակություն չունի, այն պարզապես առիթ է հանդիսացել իրեն հետապնդելու, վախեցնելու եւ լռեցնելու փորձ անելու համար: Հայտարարում է՝ չի ստացվելու, ինքը չի լռելու:
«Ես կարծում եմ, որ հենց Նիկոլ Փաշինյանի ցուցումով է ամենը կատարվում: Քանի որ ես մշտապես բարձրաձայնում եմ ցավոտ թեմաներ եւ հարցեր, որոնք համապատասխանում են իրականությանը, իրենք այս կերպ փորձում են ինձ լռեցնել»,- ասաց մեր զրուցակիցը՝ հավելելով, որ այն մարդիկ, ովքեր Հայաստանի հանրապետությունում հետապնդում են պետական եւ հանրային շահը, կարող են բացահայտել իշխանության դավաճանական ծրագրերը, այսուհետ նման հետապնդումների զոհ են դառնալու, որպեսզի վերջնարդյունքում լռեն: 44-օրյա պատերազմում տեղի ունեցածի վերլուծությունները եւ հայկական կողմի զոհերի թիվը մեր զրուցակցին հիմք են տալիս հայտարարելու, որ իշխանությունն այդ ժամանակ էլ փորձել է ազատվել հայրենանվեր եւ հայրենասեր մարդկանցից՝ նրանց առաջնագիծ գնալու կոչեր անելով, իսկ տեղում արդեն չկառավարելով պատերազմը, ընդհանուր առմամբ, եւ տարբեր ուղղություններով մարտական գործողությունները:
44-օրյա պատերազմում Մաունել Մանուկյանը նույնպես վիրավորվել է եւ չի հասկանում, թե ինչո՞ւ է իշխանական համակարգը զբաղված իրեն հետապնդելով՝ իր առողջությունը վերականգնելու հարցերով զբաղվելու փոխարեն:
Կարդացեք նաև
Ինչեւէ, մեր զրուցակիցն ասաց, որ ինքը քննությունից չի խուսափելու՝ դրա համար որեւէ պատճառ չունի: Այսօր սպասել է քննիչի զանգին, որ հանդիպեն՝ չի զանգել: Կարծում է, առաջիկա աշխատանքային օրերին կհանդիպեն:
Նելլի ԳՐԻԳՈՐՅԱՆ
