«Մենք անտարբեր չենք եղել այդ առաջարկի նկատմամբ»,- այսօր կայացած հանրային լսումների ժամանակ արձագանքելով ՀԴԿ նախագահ Արամ Սարգսյանի՝ խորհրդարանական ընդդիմությանն ուղղված մեղադրանքին, ասաց «Հայաստան» խմբակցության պատգամավոր Լիլիթ Գալստյանը՝ հավելելով, որ այս ընթացքում իրենք բազմաթիվ միջոցառումներ են կազմակերպել՝ Հայաստանում ստեղծված իրավիճակին վերաբերող, որոնց նպատակը եղել է՝ գտնել ստեղծված փակուղուց դուրս գալու իրավական եւ քաղաքական ճանապարհները: Բոլոր հավաքների եւ քննարկումների գլխավոր խնդիրը, ըստ Լիլիթ Գալստյանի, եղել եւ մնում է դիմադրության շարժման կազմակերպումը:
Հիշեցնենք, Հայաստանի դեմոկրատական կուսակցությունը եւ «Ի պաշտպանություն Արցախի հանրապետության» կազմկոմիտեն այսօր հանրային լսումներ էին կազմակերպել՝ «Արցախի եւ Սյունիքի հանձնումը Հայաստանի կործանումն է» թեմայով: Միջոցառման կազմակերպիչները գտնում են, որ Արցախի հիմնահարցի կարգավորման իրավական տարբերակն այլընտրանք չունի եւ Հայոց պետականության պահպանման եւ հզորացման գրավականը ազգային միասնությունն է: Հանրային լսումներն անցան այս երկու օրակարգային հարցերի շուրջ՝ Ազգային միասնության խորհուրդ ձեւավորելու տեսլականով:
Լիլիթ Գալստյանի գնահատմամբ, այս լսումները բավական արդյունավետ են եւ հնարավորություն կտան միավորել ազգային միասնականությունն ու դիմադրության շարժումը՝ ավետելով աշխարհին, որ Հայաստանում կա որակյալ զանգված, որը չի հանդուրժում պետականության կորուստը եւ որը «սինխրոն չէ ադրբեջանաթուրքական շահը սպասարկող իշխանության հետ»:
Կարդացեք նաև
Մանրամասները՝ տեսանյութում:
Նելլի ԳՐԻԳՈՐՅԱՆ
