Որտե՞ղ է «Պատիվ ունեմ» խմբակցության ղեկավար Արթուր Վանեցյանը, նրան չենք տեսնում Փաշինյանի հայտնի հայտարարությունից հետո, թե որտե՞ղ է 5 մլրդ-անոցը. այսօր ԱԺ ճեպազրույցի ժամանակ լրագրողների այս հարցին ի պատասխան՝ «Պատիվ ունեմ» խմբակցության քարտուղար Հայկ Մամիջանյանը նախ հորդորեց էթիկայից զուրկ պաշտոնյաներին չկրկնել. «Արթուր Վանեցյանը գրեթե ամեն օր գտնվում է ԱԺ-ում: Ազգային ժողովում չգտնվելու պարագայում գտնվում է «Հայրենիք» կուսակցության գրասենյակում: Ինչ վերաբերում է հարցուպատասխանին մասնակցության կամ չմասնակցությանը, պարոն Վանեցյանը ենթադրում է, որ հերթական ստերը լսել կարելի է ոչ միայն դահլիճում, այլ նաեւ այլ վայրերում: Իսկ Նիկոլ Փաշինյանը լավ կլինի քիչ շրջանառի 5 մլրդ-ի թեման եւ առհասարակ քիչ դրդի պարոն Վանեցյանին բարձրաձայնել այս կամ այն իրողությունները իր մասին, որոնք պարունակում են նաեւ պետական գաղտնիք: Դա իր շահերից վստահաբար չի բխում»:
Հռիփսիմե ՋԵԲԵՋՅԱՆ
