«10 օր առաջ Հ1-ի եթերում Նիկոլ Փաշինյանը հայտարարում է, որ չի կարող իրականացվել դեմարկացիա եւ դելիմիտացիա, երբ կրակում են: Դրանից հետո տեղի է ունենում ադրբեջանական կողմի հարձակում եւ մենք ունենում ենք այս պահի դրությամբ անհայտ զոհերի, գերիների, անհետ կորածների թիվ: Այդ ընթացքում ՔՊ պատգամավորները խրոխտ հակառուսական հայտարարություններ են անում, դասեր են տալիս ՌԴ-ին, ՀԱՊԿ-ին են անդրադարձ կատարում: Դրա հաջորդ օրը Նիկոլ Փաշինյանը կառավարության նիստի ժամանակ հեզաբար հայտարարում է, որ ՌԴ–ի կողմից 3 առաջարկություն է եղել ու իր համար դա ընդունելի է: Տպավորություն է, որ իրականացվում է նույն 44-օրյա պատերազմի սցենարը, որի ավարտին Նիկոլ Փաշինյանը հայտարարեց, թե փրկել է 30 հազար զինվորի կյանք ու այսպես կոչված խաղաղությունը փորձեց վաճառել մեր հասարակության վրա»,- այսօր ԱԺ ճեպազրույցների ժամանակ վերջին օրերի դեպքերի քրոնիկոնն այսպես ներկայացրեց «Հայաստան» խմբակցության պատգամավոր Ագնեսա Խամոյանը:
Խմբակցության քարտուղար Արծվիկ Մինասյանն էլ հիշեցրեց, թե ԱԳՆ-ն, Նիկոլ Փաշինյանը որքան հակասական արտահայտություններ են արել, տրամագծորեն իրարից խիստ տարբեր. «Այն բանաձեւը, որն ինքն է առաջարկում, մենք կորցնում ենք Արցախը վերջնականապես: Այդ մարդն իր հայտարարություններով օրինականացնում էր նաեւ ադրբեջանական օկուպացիան»:
Հռիփսիմե ՋԵԲԵՋՅԱՆ
