«Արդեն դժվարանում եմ որակումներ տալ, որովհետեւ այս ամենն իմ ուղեղում չի տեղավորվում… Բացի ատելությունից՝ ինձ մոտ ուրիշ բան չի արթնանում …Ես կարծում եմ, որ այժմ տեղի է ունենում սարսափելի մի բան, որի մասին ասում ենք դավադրություն, դավաճանություն: Սա մի ծրագիր է, որն իրագործվում է: Մենք՝ որպես հայ քաղաքացիներ, դաստիարակված ենք, որ ձայն չհանենք, ինչ է թե՝ ամեն բան չխառնվի, մինչդեռ այս ձայն չհանելու պատճառով ամեն ինչ էլ ավելի է խառնվում: Ձայն չհանելով՝ մենք բերում հասցնում ենք նրան, որ վաղը, մյուս օրը լինում է աղետալի մի բան…»,- «Հայելի» ակումբում ասաց ՀՀ վաստակավոր արտիստուհի, երգչուհի Աննա Մայիլյանը՝ խոսելով երկրում տիրող իրավիճակի մասին:
Նա կոչ ուղղեց տղամարդ քաղաքական գործիչներին. «Քաղաքական գործիչներ, սիրելի պարոնայք, որ լոզունգներով ելույթ եք ունենում, շատ սիրուն խոսում եք, խելացի եք, բոլորիդ հետ կարելի է համաձայնել, ես որպես հայ քաղաքացի հարց եմ ուղղում ձեզ՝ ե՞րբ եք հավաքվելու մեկդ մյուսին ձեռք մեկնելու հանուն ազգայինի, ե՞րբ եք ոտքի հանելու ժողովրդին: Ոչ թե հանուն ապագա աթոռի հեռանկարի, այլ հանուն նրա, որ չունենանք նոր զոհեր, նոր գերիներ, թույլ չտանք, որ մեզ նվաստացնեն… Հայ զինվորն իր պատմության ողջ ընթացքում հայտնի է հերոսությամբ, ռազմական ճկուն մտքով, ախր գոնե այս երեք-չորս տարվա ընթացքում կարելի էր գիտությունը զարգացնել, իսկ հների մասին խոսակցությունները վաղուց հնացած են, նավթալինի հոտ է գալիս»:
Աննա Մայիլյանի ձեւակերպմամբ. «Երեք տարվա մեջ, ամենաառաջին հարցերը, որ կարեւոր պետք է լինեին երկրի համար՝ ռազմարդյունաբերությունն էր, սահմանների ամրությունը եւ գիտության զարգացման ինչ-որ մի նշույլ պետք է երեւար, ինչը չկա: Էլ չասեմ, որ ազգայինի մասին խոսելը դարձել է վիրավորանք… Ֆաշիստն էլ դուք եք, եթե ինչ-որ մեկդ Նժդեհին մի բան կասի»:
Գոհար ՀԱԿՈԲՅԱՆ
Կարդացեք նաև
Լուսանկարը՝ Աննա Մայիլյանի ֆեյսբուքյան էջից
