«Ակնհայտ է, որ այս իշխանության ղեկին գտնվող մարդը միայն արյուն, ավեր, քաոս, պառակտում է բերել ու բերելու, քանի դեռ իշխանություն է»,- այսօր հրավիրած ասուլիսում ասաց «Հայաստան» խմբակցության պատգամավոր Աղվան Վարդանյանը: Նա դեժավյու է ապրում, կարծես 44-օրյա պատերազմի ապատեղեկատվական շրջանի մեջ լինենք. «Նույնիսկ «հաղթելու ենք»-ի հեղինակն է գործի գնացել»,- հեգնեց պատգամավորը:
Նա վստահ է, որ իրենց նախաձեռնած դիմադրության շարժումը քայլ առ քայլ հզորանալու է ու հասնի այս իշխանությունների հեռացմանը:
Այսօր վարչապետ Նիկոլ Փաշինյանը ԱԺ-կառավարություն հարցուպատասխանի ժամանակ հայտարարեց, որ ով չկրակելու հրաման է տվել՝ դավաճան է: Աղվան Վարդանյանի խոսքով՝ Սյունիքում մայիսի 12-ին ՀՀ ինքնիշխան տարածքի զավթում եղավ, Սոթքում, Շորժայում, մյուս տեղերում. «Այն ժամանա՞կ էլ չկրակելու հրաման տվողները դավաճան էին: Քանի՞ հրաման տվող է 6-8 ամսվա ընթացքում այդ պիտակին արժանացել»:
Փաշինյանը նաեւ ասել էր, որ դեռ պետք է քննվի, թե ինչ պայմաններում է զինվորը գերեվարվել: Հարցին՝ այսինքն, գերի ընկնելուց ու վերադառնալուց հետո զինվորը դեռ կարող է ենթարկվել քրեական պատասխանատվությա՞ն՝ «Հայաստան» խմբակցության պատգամավոր Արամ Վարդեւանյանը պատասխանեց. «Իսկապես, սթափ կերպով հնարավոր չէ ընկալել այդ միտքը, միգուցե պետք է անսթափ լինել, որ հասկանալ ինչ է ասում: Եթե նման միտք արտահայտի Ալիեւը կամ ալիեւները, միգուցե տրամաբանություն իրենց ազգի շահերից կարելի է գտնել: Իրավական հիմք չկա»: Վարդեւանյանն ասաց, որ կարող ենք չզարմանալ, եթե թշնամին օգտվի այդ հայտարարությունից:
Կարդացեք նաև
Աղվան Վարդանյանը հիշեցրեց, որ Փաշինյանը պատրաստ էր իր տղային փոխանակել գերիների հետ ու այդ ժամանակ չէր ասում, թե ինչ պայմաններում են գերի ընկել. «Հիմա արդեն սրվել է, նոր խնդիր է առաջացել, նոր «կռուտիտներ» է անում: Այսօր գերիների մասին նման հայտարարություն անել անբարոյականության վերջին սահմանն է»:
Հռիփսիմե ՋԵԲԵՋՅԱՆ
