Ռուսաստանը Հայաստանին և Ադրբեջանին կոչ է անում զսպվածություն ցուցաբերել և թույլ չտալ նոր միջադեպեր: Այս մասին այսօր տեղի ունեցած ճեպազրույցում հայտարարել է Ռուսաստանի ԱԳՆ պաշտոնական ներկայացուցիչ Մարիա Զախարովան՝ անդրադառնալով վերջին օրերին հայ-ադրբեջանական սահմանին ծավալվող իրադարձություններին:
«Բաքվի և Երևանի պաշտոնական ներկայացուցիչների հայտարարություններից երևում է, որ կողմերը միանգամայն հակառակ կերպով են գնահատում իրավիճակը և մեղադրում են միմյանց կատարվածի մեջ»,- ասել է Զախարովան՝ հավելելով, որ Ռուսաստանը մշտական կապ է պահպանում Ադրբեջանի և Հայաստանի հետ՝ իրավիճակը խաղաղ հունի բերելու համար:
Նա նաև նշել է, որ իրենք շարունակում են համատեղ աշխատանքը՝ լարվածությունը թուլացնելու համար:
«Մենք կոչ ենք անում երկու կողմերին զսպվածություն ցուցաբերել, թույլ չտալ նոր միջադեպեր և բոլոր հարցերը լուծել բացառապես քաղաքական-դիվանագիտական ճանապարհով: Պատրաստ ենք հետագայում էլ երկրներին ցուցաբերել աջակցություն՝ ի շահ տարածաշրջանում խաղաղության և կայունության պահպանման»,- ասել է նա:
Կարդացեք նաև
Զախարովայի խոսքով՝ վերջին իրադարձությունները հաստատում են հայ-ադրբեջանական սահմանի սահմանազատման, և հետագայում սահմանագծման գործընթացի շուտափույթ մեկնարկի անհրաժեշտությունը, ինչպես նաև «ավելի վաղ Ռուսաստանի կողմից արված առաջարկների հիման վրա համապատասխան համատեղ հանձնաժողովի աշխատանքների մեկնարկը»:
Ինչ վերաբերում է ԵԱՀԿ Մինսկի խմբի համանախագահների աշխատանքին, Զախարովան հիշեցրել է, որ այս պահին եռյակը գտնում է Վիեննայում՝ ընթացիկ իրավիճակը քննարկելու համար:
«Մենք ևս մեկ անգամ վերահաստատում ենք համանախագահների՝ տարածաշրջան կատարվելիք այցի անհրաժեշտությունը»,- ասել է Զախարովան:
ԱԳՆ ներկայացուցիչը նաև անդրադարձել է Ռուսաստանի կամ ՀԱՊԿ-ի խողովակներով Հայաստանին օգնություն ցուցաբերելու մասին հարցերին:
«Ռուսաստանը լրջորեն է վերաբերում իր ինչպես երկկողմ, այնպես էլ բազմակողմ պարտավորություններին: Երկկողմ մասով անցկացվում են համապատասխան խորհրդակցություններ… Ինչ վերաբերում է Հավաքական անվտանգության պայմանագրի կազմակերպությանը, ապա, մեր ունեցած տեղեկություններով, այնտեղ ուշադիր հետևում են հայ-ադրբեջանական սահմանին տիրող իրավիճակին»,- ասել է Զախարովան:
Պատրաստեց Վիկտորյա ԱՆԴՐԵԱՍՅԱՆԸ
