«Բնականաբար, կառավարությունն ուսումնասիրել է դե յուրե նշանակություն ունեցող բոլոր փաստաթղթերը՝ սովետական ՀՀ-ի եւ Ադրբեջանի միջեւ սահմանազատում իրականացնելու վերաբերյալ։ Նման փաստաթղթեր գոյություն ունեն։ Որեւէ նման փաստաթղթով խնդրո առարկա հատվածը ՀՀ տարածքում չի գտնվում»,-ԱԺ-կառավարություն հարցուպատասխանի ժամանակ այսօր հայտարարեց վարչապետ Նիկոլ Փաշինյանը՝ պնդելով իր տեսակետը, թե ադրբեջանական մաքսակետերը տեղադրվել են ՀՀ-ի տարածք չհանդիսացող հատվածում։
Նա նշեց․ «Երբ ասում ենք, որ երեկվա գործողությունների թատերաբեմը, միանշանակ, ՀՀ տարածք է, ապա մենք դա գիտենք նույն կերպ, ինչպես գիտենք, որ Էյվազլին եւ Չայզամին ՀՀ տարածք չեն։ Մեր մոտեցումները սրանով են հիմնավորված։ Եվ կապ չունի՝ Ադրբեջանն անկախանալիս իրեն հռչակե՞լ է սովետական Ադրբեջանի իրավահաջորդ, թե ոչ, որովհետեւ ՀՀ-ն անկախություն է հռչակել սովետական ՀՀ-ի տարածքում եւ միջազգային հանրությունը ՀՀ-ին ճանաչել է որպես այդպիսին։ Հետեւաբար, այն սահմանագիծը, որը ԽՍՀՄ ժամանակ ունեցել է դե յուրե նշանակություն, հիմա էլ ունի՝ միջազգայնորեն»։
Լուիզա ՍՈՒՔԻԱՍՅԱՆ
