Եվրամիությունը կոչ է արել Հայաստանին ու Ադրբեջանին հետ քաշել զորքերը և հարգել նախօրեին համաձայնեցված հրադադարը:
Հայտարարության մեջ նշվում է, որ Եվրամիությունը խորապես մտահոգված է հայ-ադրբեջանական սահմանին բռնության վերջին միջադեպի կապակցությամբ, որը, ցավոք, հանգեցրել է մարդկային զոհերի:
«Եվրամիությունը կոչ է անում Հայաստանին և Ադրբեջանին առավելագույն զսպվածություն ցուցաբերել, հետ քաշել զինված ուժերը տեղերում և հարգել երկու եռակողմ համաձայնագրերի շրջանակներում ստանձնած պարտավորությունները: Մենք կոչ ենք անում երկու կողմերին վերսկսել բանակցությունները՝ ծառացած խնդիրների, այդ թվում սահմանազատման վերաբերյալ համապարփակ համաձայնագրի վրա աշխատելու ուղղությամբ»,- ասվում է հայտարարության մեջ:
Նշվում է նաև, որ ԵՄ-ը համակարծիք է ԵԱՀԿ Մինսկի խմբի նոյեմբերի 15-ի հայտարարության հետ: «ԵՄ-ը վերահաստատում է իր հանձնառությունը՝ աշխատել Հայաստանի և Ադրբեջանի հետ՝ օգնելու հաղթահարել լարվածությունը և նպաստելու անվտանգ, կայուն, բարգավաճ և խաղաղ Հարավային Կովկասի կառուցմանը՝ ի շահ տարածաշրջանում ապրող բոլոր ժողովուրդների»,- ասվում է հայտարարության տեքստում:
Կարդացեք նաև
Պատրաստեց Վիկտորյա ԱՆԴՐԵԱՍՅԱՆԸ
