«Չի կարող միջանցք տրամադրվել Ադրբեջանի հանրապետությանը եւ ուժով որեւէ երկիր, Ադրբեջանը՝ մեր թշնամի երկիրը չի կարող ստանալ այդ միջանցքը: Դա արդեն կվերածվի լայնածավալ պատերազմի եւ ՀՀ-ն ու մեր ժողովուրդը չի հանդուրժելու ոտնձգությունը մեր երկրի նկատմամբ: Հիմա փորձում ենք հրադադարի հասնել խաղաղ ճանապարհով»,- այսօր ԱԺ-ում լրագրողների հետ զրույցում հայտարարեց ՔՊ պատգամավոր Արմեն Խաչատրյանը:
Նա վստահեցրեց՝ եթե թշնամական ոտնձգությունները շարունակվեն, մենք չենք հանդուրժելու. «Որեւէ մեկը չի հանդուրժելու ՀՀ տարածքի վրա հարձակում: Մեր համբերությունն էլ սահման ունի: Անկախ ամեն ինչից, ռազմական առավելությունից, Սյունիքում որեւէ հաջողության թշնամին չի կարող այլեւս հասնել»:
Հարցին՝ այդ ոտնձգությունը միջանցքի համա՞ր է՝ Արմեն Խաչատրյանը պատասխանեց, որ տարբերակներից մեկն այն է, որ այո, դա միջանցքի տրամադրման համար է:
Հարցին՝ Էդուարդ Աղաջանյանը խոսում էր 15 զոհի մասին, ՊՆ-ն նշում է 1 զոհի մասին, ինչո՞ւ են իշխանության երկու տարբեր ճյուղեր հակասական տեղեկատվություն տալիս՝ Արմեն Խաչատրյանը պատասխանեց. «Ժողովուրդ ջան, պատերազմական իրավիճակ է, կապ է կորել մարդկանց հետ, ճշտումների խնդիր կա»: Պատգամավորն ասաց, որ զոհերի կոնկրետ թվի մասին ինքը տեղեկություններ չունի ու չի կարող հրապարակել:
Կարդացեք նաև
Արմեն Խաչատրյանը նաեւ ասաց, որ դիրքեր կան, որ հետ ենք վերցրել, բայց թե այս պահին որտեղ ինչ ուժեր են կենտրոնացած՝ այս պահին չի կարող հայտնել:
Հռիփսիմե ՋԵԲԵՋՅԱՆ
