Քիչ առաջ Գյումրի բժշկական կենտրոնից տեղեկացանք, որ շոկային վիճակում, կրծքավանդակի ստորին վերջույթների բազմաբեկորային վնասվածքով, պնևմոթորաքսով հիվանդանոց է տեղափոխվել մի երիտասարդ, որին անմիջապես վիրահատել են։
Գյումրի բժշկական կենտրոնի փոխտնօրեն Արմեն Խաչատրյանն Aravot.am-ին փոխանցեց, որ երիտասարդը վերակենդանացման բաժանմունքում է, վիճակը ծանր է։
ՀՀ ոստիկանության լրատվության վարչության պետի տեղակալ Էդգար Ջանոյանն էլ մեզ տեղեկացրեց՝ ոստիկանություն ահազանգ է ստացվել, որ Գյումրու Լալայան փողոցում՝ հայկական զորամասի պարսպից դուրս, պայթյուն է տեղի ունեցել, մեկ անձ տեղափոխվել է հիվանդանոց։
Նախնական տեղեկություններով, երիտասարդը 18 տարեկան է։ Պայթյունի ձայն լսելով, զորամասի աշխատակիցները դուրս են վազել, տեսել են մի տղայի՝ վիրավորում ստացած, նա եղել է միայնակ։ Թե ինչից է առաջացել պայթյունը, դեռ հայտնի չէ։
Կարդացեք նաև
Հանգամանքները պարզվում են, կատարվում է նախաքննություն։
Նշենք, որ Մսի կոմբինատ թաղամասում է գտնվում Գյումրիում հայկական ամենամեծ զորամասերից մեկը, գյումրեցիներին հայտնի «Դաթոյի չաստը»։
Նունե ԱՐԵՎՇԱՏՅԱՆ
