«Ինձ ապշեցնում է հայ քաղաքական մտքի անհասկանալի կեցվածքը»,- «Հոդված 3» ակումբի կազմակերպած քննարկման ընթացքում ասաց պատմության հետազոտող, «Հայկական ուսումնասիրությունների ԱՆԻ հիմնադրամ»-ի համակարգող Թաթուլ Հակոբյանը:
Նա ընդգծեց, որ այս պահին, երբ Հայաստանի Հանրապետության ապագան է անորոշ դառնում, պատերազմում պարտությունից հետո շարունակում ենք անկում ապրել և չգիտենք, թե որտեղ է հատակը, որտեղ պետք է կանգնենք, հայ ժողովրդի մի մեծ հատվածի շարունակում է հետաքրքրել Մեծ Բրիտանիայում Հայոց ցեղասպանության ճանաչման խնդիրը. «Ինձ ապշեցնում է, երբ որ համահայկական կառույցները շարունակում են առաջնահերթություն տալ խնդիրների, որոնք այսօր Հայաստանի Հանրապետության օրակարգում չպետք է լինեին առաջնային: 5 տարի առաջ գուցե ճիշտ էր, որ այդպես լիներ: Մեր սփյուռքյան կազմակերպությունները, մեր լոբբիստական կազմակերպությունները ուղղակի պետք է թմբակահարեին, «ռմբակոծեին» դեսպանատները, կազմակերպությունները, լոբբիստական խմբերը: Եվ այդ ուղղությամբ ցավալիորեն չեմ տեսնում աշխատանք: Մենք ունենք ցանցային կառույցներ, և նրանց աշխատանքը այս պահին չի զգացվում, մենք չենք զգում: Տպավորություն ունեմ, որ Հայաստանը թողնվել է ճակատագրի հեգնանքին, և քամիները այս Հայաստանը, այս պարտված, ծնկի եկած Հայաստանը ոնց ուզում են այն ուղղությամբ էլ տանում են»:
Թաթուլ Հակոբյանն անդրադարձավ նաև արտաքին գործերի նախարարության աշխատանքին. «Մեր արտգործնախարարության ուղեղը ուղղակիորեն հանած է այս պահին: Մենք արտգործնախարարություն չունենք: Գիտե՞ք դա ինչի է նման, երբ որ քո առաջ դրված է համակարգիչ, բայց այդ համակարգիչը կախել է: Հիմա Հայաստանի արտգործնախարարության ուղեղը «կախած է»: Հեռացել են մեր լավագույն դիվանագետները, չկա համակարգվածություն, չի աշխատում Երևանի և դեսպանատների կապը: Մի այլանդակ, մի «բառդակ» վիճակ է, ներողություն եմ խնդրում այս բառի համար: Եվ սրա պատասխանատուն Նիկոլ Փաշինյանն է և իր աղետալի թիմը: Սա է ցավալի իրականությունը»:
Կարդացեք նաև
Ամի ՉԻՉԱԿՅԱՆ
Լուսանկարը Թաթուլ Հակոբյանի ֆեյսբուքյան էջից
