Շվեդիայում հայոց լեզվի ուսուցիչ Աշոտ Շիրոյանի փայտե աշխատանքները հիացնում են թե հայերին, թե օտարազգիներին։
Նրանցից յուրաքանչյուրն իր հետաքրքիր պատմությունն ունի։
Օրերս Ստոկհոլմի Գամլա Ստան (Հին քաղաք) թաղամասի Յամանաշի ցուցասրահում բացվեց Աշոտ Շիրոյանի «Պատմություններ Սկուկլոստերից» ցուցադրությունը։ Արվեստագետի ներշնչանքի աղբյուրը Սկուկլոստեր թերակղզու հրաշք բնությունն է, որտեղ նաև հին միջնադարյան շվեդական ամրոց կա։
Կարդացեք նաև
Աշոտը պատմում է, որ մի անգամ նկատել է, թե ինչպես են Սկուկլոստերի անտառում սանիտարական նպատակով կտրում ծառերի որոշ հատվածներ, որոնք կոտրվել էին փոթորիկների հետևանքով կամ միջատներն էին վնասել: «Դրանք հետո վառելափայտ, թեփ, պարարտանյութ կամ մի այլ կերպ էին օգտագործվելու, դրա համար խնդրեցի, որ ինձ տան փայտի կտորները։ Ներկայացրի, թե ինչ նպատակով եմ օգտագործելու, սիրով տվեցին»,-պատմում է մեր զրուցակիցը։
Հաճախ 350 տարեկան լորենու, ակացիայի և այլ ծառատեսակների փայտն է օգտագործում՝ դրանց տալով մարդկային դիմագծեր, հրեշտակի կամ ծաղկի տեսք։ Կան նաև աբստրակտ գործեր՝ հետաքրքիր փիլիսոփայությամբ։ Աշոտը փորձում է հնարավորիս պահպանել փայտի օրիգինալ ձևը և էլ ավելի նկատելի դարձնել նրա բնական գեղեցկությունը։
Հավելենք, որ Աշոտ Շիրոյանը աշխատել է կինոյի և երաժշտության ոլորտում։ Ցուցասրահում հնչում էր նրա գրած երաժշտությունը։
Լուսինե ՕՀԱՆՅԱՆ
Շվեդիա
