«Բավականին հանգիստ ու օրինական գործընթաց է ընթանում՝ համեմատած այլ տեղական ինքնակառավարման մարմինների ընտրությունների հետ»,-Կապանում հրավիրված մամուլի ասուլիսի ժամանակ տեղեկացրեց «Անկախ դիտորդ» դաշինքի ներկայացուցիչ Դանիել Իոաննիսյանը:
Նա հայտնեց՝ մի շարք ընտրական տեղամասերում արձանագրել են ընտրախախտումներ ու մանրամասնեց. «17 ընտրատեղամասերում արձանագրել ենք քվեախցիկից դուրս քվեարկության 54 դեպք: Չորս ընտրատեղամասերում եղել են դեպքեր, որ ընտրողները քվեախցիկ մուտք գործեն այլ անձանց հետ: 25/6 տեղամասում գրանցվել է բաց քվեարկության դեպք, 35/44 ընտրատեղամասի շենքի մոտ եղել են ՔՊ-ի և «Շանթ» դաշինքի պաստառներ, 35/42 ընտրատեղամասին կից շինության պատին երկու քաղաքական ուժերի պաստառներն էլ եղել են, 35/22-ում եղել են կուտակումներ, որոնք ենթադրաբար կազմակերպված են եղել մի քաղաքական ուժի կողմից:
Աղվանի ուղղությամբ արձանագրել ենք պաստառներ, որոնք փակցված էին օրենքի խախտմամբ. ՔՊ-ի և Շանթ դաշինքի պաստառներ ենք արձանագրել: Բայց բավականին արագ հեռացվել են: Արծվանիկում և այդ ուղղությամբ Կապանի փոխքաղաքապետի խնդրահարույց գործունեությունն է դիտարկվել, որը, չունենալով համապատասխան իրավունք, այցելում էր ընտրատեղամաս ու փորձում ցույց տալ, թե ինքն է իշխանությունը, այնինչ ընտրատեղամասերում իշխանությունը ընտրական հանձնաժողովներինն է: Ճակատենի մասով հիմնական խնդիրն այն է, որ բազմաթիվ ընտրողներ քվեարկել են օգնողով: Խոսքը տասը տոկոսից մեծ թվի մասին է: Փաստացի օգնողն է քվեարկել ընտրողի փոխարեն: Շատ տեղերում եղել են քվեարկության գաղտնիության հետ կապված խնդիրներ, օրինակ՝ քվեատուփի հետևում միջանցք է եղել, դուռ պատուհան, արձանագրվել է մեկ դեպք, երբ ընտրողը լուսանկարել է իր քվեաթերթիկը»:
Լրագրողների փաստմանը՝ այսօր Կապանում մեծաթիվ ոստիկանական ուժեր են կենտրոնացվել, դա արդյոք չի՞ խոչընդոտում ընտրություններին, Դանիել Իոաննիսյանը պատասխանեց. «Կապանում իրապես ոստիկանական ուժերը շատ են՝ կարմիր բերետավորների գումարտակից, ոստիկանական զորքերի որոշ ստորաբաժանումներ: Կապանում նրանք այսօր ավելի շատ են, քան սովորաբար: Դա ակնհայտ է: Ինձ թվում է հասնում ենք նրան, որ մեծ հաշվով ոստիկանի ներկայությունն ընդգծում է, որ օրինականությունն ավելի պաշտպանված է, և այն պետք է հակազդի տարբեր կրիմինալ ներգործությունների՝ ոչ պարտադիր թաղի խուժանի: Այո, Կապանում մեծաթիվ են ոստիկանական ուժերը, բայց առ այս պահը չի արձանագրվել մեր կողմից ուժի կիրառման դեպք ոստիկանի կողմից»:
Կարդացեք նաև
Տաթև ՀԱՐՈՒԹՅՈՒՆՅԱՆ
