Կապան համայնքի ավագանու ընտրություններում առաջադրված «Քաղաքացիական պայմանագիր» կուսակցության ցուցակը գլխավորող Դավիթ Դանիելյանը քվեարկության եկավ կեսօրից հետո։ Նա քվեարկեց հանուն անվտանգ Կապանի ապագայի։ Պատասխանելով լրագրողների հարցերին՝ թեկնածուն անդրադարձավ անվտանգային հարցերի։ «Այժմ բանակցություններ են ընթանում եւ տանում են նրան, որ լինեն սահմանագծման եւ սահմանազատման աշխատանքներ, որ մեր հաջորդ սերունդները մեզնից ժառանգեն սահմանագծված եւ սահմանազատված պետություն»,-ասաց Դավիթ Դանիելյանը։
Հարցին, թե ըստ Նիկոլ Փաշինյանի՝ այն հատվածներում որտեղ ադրբեջանական անցակետեր են տեղակայվում, այդ տարածքները ադրբեջանական են, եւ Դավիթ Դանիելյանն արդյո՞ք ընդունում է, որ դրանք ադրբեջանական տարածքներ են՝ թեկնածուն պատասխանեց․ «Հայաստանի Հանրապետությունը ժառանգել է մի քաղաքական իրավիճակ, որի արդյունքում շատ հարցերի պատասխաններ ստիպված ենք ստանալ բանակցությունների արդյունքում»։
Դիտարկմանը՝ թե չի՞ ընդունում, որ դա հայկական տարածք է, Դանիելյանն արձագանքեց․ «Իմ պապն ինձ ասել է, որ Հայաստանն սկսվում է Փայտակարանից եւ անծայրածիր երկիր է»,- ասաց նա։ Ըստ պատգամավորի՝ բոլոր սահմանամերձ գյուղերի համար այլընտրանքային ճանապարհներ են կառուցվում՝ նշելով նաեւ, որ Ճակատենի համար էլ է այլընտրանքային ճանապարհ կառուցվում։
Ինչ վերաբերում է Գորիս-Կապան ավտոճանապարհին ադրբեջանցիների կողմից մաքսակետ տեղադրելու փաստին, Դավիթ Դանիելյանը լսել է կառավարության անդամների հայտարարությունները, ըստ այդմ՝«անցագրային ռեժիմին անցնելը, այսինքն` անցակետ տեղադրելը կապված է ՀՀ շահերից չբխող որոշումներին դեմ գնալու հետ»։
Կարդացեք նաև
«Հատկապես «միջանցքին» չհամաձայնվելու փաստի հետ է կապված եւ ես վստահ եմ, որ ցանկացած սյունեցի այդ քայլը ողջունում է, որ միջանցք չպետք է լինի»,-ասաց նա։
Մանրամասները տեսանյութում։
Արմեն ԴԱՎԹՅԱՆ
