Այսօր ՏԻՄ ընտրություններ են անցկացվում նաեւ Լոռու մարզի Ստեփանավան համայնքում: Ստեփանավան խոշորացված համայնքը ներառում է Ստեփանավան, Ուրասար, Արմանիս եւ Կաթնաղբյուր բնակավայրերը: Այստեղ ընտրելու իրավունք ունի 13.333 բնակիչ: Ժամը 14:00-ի դրությամբ նրանցից քաղաքացիական պարտքը կատարել է ընդամենը 2.572 ընտրող. «Սա ընտրողների 19.29 տոկոսն է կազմում: Մի քիչ պասիվ է, բայց քանի որ օրը չի վերջացել, ոչինչ չենք կարող ասել: Իմ կարծիքն է, որ Covid-ի պատճառով շատ մարդիկ մեկուսացած են»,- Aravot.am-ի զրույցում ասաց թիվ 25 ԸԸՀ-ի քարտուղար Կարինե Մուրադյանը:
Նա նաեւ տեղեկացրեց, որ մինչ 14:00-ն ընտրատեղամասն ահազանգեր ու բողոքներ չի ստացել. «Խնդիրներ ու բողոքներ չունենք: Մի քանի թեթեւ հարցեր են եղել, որ առավոտյան կարգավորվել է՝ ինչ-որ խցիկ ու սեղան տեղափոխելու, դուռ փակելու հետ: Դեռ ընտրախախտում կամ այդպիսի բողոք չունենք»:
Կարդացեք նաև
Ավագանու ընտրություններին մասնակցում են՝ «Բարգավաճ Հայաստան», «Հայ ազգային կոնգրես» եւ «Քաղաքացիական պայմանագիր» կուսակցությունները, իսկ համայնքի ղեկավարի թեկնածուներն են համապատասխանաբար՝ Արտեմ Ղարագյոզյանը, Վանո Հակոբյանն ու ՝ Արմեն Գրիգորյանը:
Ընտրություններն անց են կացվում 13 ընտրատեղամասում, դրանցից 10-ը տեղակայված են Ստեփանավան քաղաքում, մյուս 3-ը՝ Ուրասար, Արմանիս եւ Կաթնաղբյուր բնակավայրերում:
Տաթեւիկ ՂԱԶԱՐՅԱՆ
