Այսօր նոյեմբերի 14-ին Կապանում՝ առաջին անգամ անկացվում են համայնքի ավագանու համամասնական ընտրություններ։ Առաջադրվել են երկու ուժ՝ «Քաղաքացիական պայմանագիրը», որի ցուցակը գլխավորում է Ազգային ժողովի պատգամավոր Դավիթ Դանիելյանը եւ «Շանթ դաշինք» ազգայնական կուսակցությունը։ Վերջինիս ցուցակը գլխավորում է Կապանի գործող համայնքապետ Գեւորգ Փարսյանը։
Նա առավոտյան ժամը 8-ին քվեարկեց 35/10 տեղամասում։ Թեկնածուն այս տեղամասի առաջին քվեարկողն էր։
Քվեարկելուց հետո պատասխանելով լրագրողների հարցերին՝ Գեւորգ Փարսյանը նշեց, որ Հանրային հեռուստաընկերության կազմակերպած բանավեճին անիմաստ է գտել մասնակցելու, քանի որ նախապես ունեցել է քաղաքացիների հետ հանդիպման ժամանակացույց։
Ընդդիմադիր «Հայաստան» դաշինքը հայտարարել է, որ սատարում է Գեւորգ Փարսյանին, եւ կոնկրետ ինչ աջակցություն է իրեն ցուցաբերվել՝ համայնքապետը նշեց, որ սատարելու որեւէ բան չի նկատել նրանց կողմից։ «Որտե՞ղ եք տեսել, որ ինձ աջակցում են, եթե ուշադիր լինեք, Սեյրան Օհանյանը ասել է, որ պարոն Փարսյանը մեր լավագույն գործընկերներից է, դա ձեւափոխել են, որ լավագույն ընկերն է, իսկ ես այնպես եմ հասկացել, որ պարոն Օհանյանը գովաբանել է ինձ որպես լավագույն համայնքի ղեկավարներից»,-ասաց նա:
Կարդացեք նաև
Ինչ վերաբերում է գաղափարական հակասություններին՝ «Շանթ դաշինք» կուսակցության եւ իր հայացքների միջեւ, Փարսյանը հայտարարեց, որ կուսակցության հիմնական գաղափարներն իր համար ընդունելի են։ «Ընդհանուր առմամբ մոտեցումների հետ խնդիրներ չունենք, բայց կան որոշակի հարցեր, որոնց շուրջ հայտարարի են գալիս ընդհանուր քննարկման արդյունքում»,-նշեց նա:
Անդրադառնալով Կապանում այսօր առկա խնդիրներին, Փարսյանն ասաց, որ անվտանգության հետ կապված իրենք վաղուց են աշխատանքներ կատարում, համագործակցում են բոլոր գերատեսչությունների հետ, համայնքապետարանում ունեն անվտանգության գծով աշխատակիցներ եւ անում են ամեն ինչ Կապանի անվտանգությունը ապահովելու համար:
Այն հարցին, թե շարունակո՞ւմ է պահանջել Նիկոլ Փաշինյանի հրաժարականը, Փարսյանն ասաց, որ հունիսի 20-ին կայացել են խորհրդարանական ընտրություններ եւ ժողովուրդն իր որոշումը կայացրել է:
Մանրամասները տեսանյութում։
Արմեն ԴԱՎԹՅԱՆ
