Վանո Սիրադեղյանի ծննդյան 75-ամյակի հոբելյանական միջոցառումների շրջանակում Հրանտ Մաթեւոսյանի թանգարանում կայացած միջոցառման ժամանակ «Հայեր» համահայկական մեդիահարթակի հիմնադիր Արայիկ Մանուկյանը երեք զվարճալի պատում ներկայացրեց:
Դրանցից մեկը վերաբերում էր Վերջին զանգի արարողությանը, որը Վանո Սիրադեղյանի որոշմամբ սկսեց տոնվել հրապարակում. «Եթե հիշում եք՝ առաջին տարին ուղղաթիռից ծաղիկներ բաց թողեցին ներքեւ: Երկրորդ տարին այդ արարողության նախապատրաստական փուլն էր, Վանոն հրապարակում էր: Մոտեցա հարցրի՝ էլի ծաղիկնե՞ր ենք վերեւից թափելու… Ասաց՝ ամեն տարին նույն բանը չեն անի: Հիշում եմ ԳԱԻ պետ կար՝ Վահագը, տեսա շատ ջղայնացած է… Ասաց՝ չեմ հասկանում՝ ես ԳԱԻ պետ եմ, թե ղուշբազ, երկու շաբաթ է ուղարկել է շրջաններ, ղուշ եմ փնտրում, էսօր աղավնիներ ենք բաց թողնելու»:
Կարդացեք նաև
Երկրորդ պատմությունը, որ ներկայացրեց Արայիկ Մանուկյանը Խանջյան 27 սրճարանի հետ էր կապված, որը Վանոյի գաղափարն էր. «Այդ սրճարանի ճաշացանկը կազմել էինք ես ու Արտակ Գնունին… Մենյուն քաղաքական թեմաներով էր, օրինակ՝ «Ստամբուլը դարձնենք արյան ծով», դա սթեյք էր… Ինքը շատ սիրում էր սեւ փոքրիկ հացի վրա կարագն ու ձուկը: Դրա անունն էլ դրել էինք Վանիկ Սմբատիչ: Ինքը սկզբում շատ լավ ընդունեց այդ գաղափարը… Հետո հենց սրճարանը սկսեց աշխատել, իսկ էդ ձուկը մարդիկ հավանեցին, բայց մեկ հատով հնարավոր չէր կշտանալ… Ասում էին՝ մի 10 հատ Վանիկ Սմբատիչ տվեք… Մի օր էլ չդիմացավ, ասաց՝ մենյուն փոխեք, վատն է»:
Այլ մանրամասներ՝ տեսանյութում.
Գոհար ՀԱԿՈԲՅԱՆ
