ՀՀ դատական դեպարտամենտի ղեկավար Խաչիկ Ղազարյանը հայցադիմում է ներկայացրել Վարչական դատարան՝ ընդդեմ Հանրային խորհրդի նախագահ Ստյոպա Սաֆարյանի։ «Փաստինֆո»-ի հաղորդմամբ՝ դատական դեպարտամենտի ղեկավարը պահանջում է Ստյոպա Սաֆարյանին վարչական պատասխանատվության ենթարկել՝ ՎԻՎՕ 206.17-րդ հոդվածի հիմքով։
Ինչպես արդեն տեղեկացրել ենք՝ Ստյոպա Սաֆարյանը հրապարակավ հայտարարել է իր հաղորդման հիման վրա Երևանի ընդհանուր իրավասության դատարանի դատավոր Զարուհի Նախշքարյանի նկատմամբ կարգապահական վարույթի հարուցման մասին, ինչի իրավունքը չուներ՝ մինչև ՀՀ արդարադատության նախարարության կողմից ԲԴԽ համապատասխան միջնորդություն ներկայացնելը։
Վարչական իրավախախտումների վերաբերյալ օրենսգրքի 206.17-րդ հոդվածը սահմանում է, որ դատավորի նկատմամբ կարգապահական վարույթ հարուցելու հաղորդում ներկայացրած անձի կողմից վարույթի վերաբերյալ տեղեկություններ հրապարակելը՝ մինչև կարգապահական վարույթ հարուցած մարմնի կողմից դատավորին կարգապահական պատասխանատվության ենթարկելու միջնորդությամբ ԲԴԽ դիմելը՝ առաջացնում է տուգանքի նշանակում՝ սահմանված նվազագույն աշխատավարձի երկուհարյուրապատիկի չափով: Դեպարտամենտի ղեկավարը Վարչական դատարանից պահանջում է Սաֆարյանի նկատմամբ նշանակել տուգանք՝ սահմանված նվազագույն աշխատավարձի երկուհարյուրապատիկի չափով։
Հայցադիմումը կքննի դատավոր Գրիգոր Առաքելյանը։
Կարդացեք նաև
Հիշեցնենք, որ Սաֆարյանին վարչական պատասխանատվության կանչելու մասին բարձրաձայնել են հենց դատավոր Զարուհի Նախշքարյանի փաստաբանները՝ ԲԴԽ ներկայացված դիմումով, ինչն ուսումնասիրության առարկա էր դարձել։
Իզաբել ՍԱՀԱԿՅԱՆ
