ԱԺ առողջապահության հարցերի մշտական հանձնաժողովն այսօր քննարկում էր «Թմրամիջոցների եւ հոգեմետ նյութերի մասին» օրենքում լրացում կատարելու մասին հարցը: Ըստ այդմ, առաջարկվում է հոգեմետ եւ հոգեներգործող նյութերի օգտագործումը դարձնել լիցենզավորվող գործունեություն: Նաեւ առանց լիցենզիայի փորձաքննություն թույլատրել իրականացնել նաեւ ԳԱԱ փորձաքննությունների ազգային բյուրոյին ևս:
Լենա Նանուշյան
ՀՀ առողջապահության փոխնախարար Լենա Նանուշյանն էլ հավելեց՝ քննարկումների արդյունքում եկել են եզրակացության, որ բացառությունների շարքը ոչ թե պետք է մեծացնել, այլ փոքրացնել՝ առանց լիցենզավորման փորձաքննություն թույլատրելով միայն ոստիկանությանը:
Ընդվզեց քննարկմանը ներկա ՀՀ ԳԱԱ փորձաքննությունների ազգային բյուրոյի տնօրենը՝ նկատելով, իրենց կազմակերպությունը ժամանակակից պահանջներին հարիր փորձաքննություններ է իրականացնում եւ անգամ մեկ բացառությունը, տվյալ պարագայում ոստիկանության համար, խտրական վերաբերմունք է: Բացի այդ, «Լիցենզավորման մասին» ՀՀ օրենքը հստակ սահմանում է տնտեսական հավասար պայմանների մեկնարկը: Նա նկատեց, որ որոշ ուղղություններով, նախաքննության մարմինը միայն իրենց է դիմում փորձաքննությունների համար, քանի որ մասնագիտական եւ տեխնիկական ապահովվածության հարցեր կան: ՀՀ ԳԱԱ փորձաքննությունների ազգային բյուրոյի գործունեությունն օգոստոսի 16-ից կասեցված է՝ լիցենզավորման գործընթացի հետ կապված:
Նախագիծը երկու ամսով հետաձգվեց՝ հավելյալ համաձայնությունների համար:
Կարդացեք նաև
Նելլի ԳՐԻԳՈՐՅԱՆ
